Almatynyń 2040 jylǵa deıíngí Bas josparyn túzetu boıynsha qoǵamdyq talqylaular ayasynda mūndaı ís-sharalardy ótkízbesten būryn zańmen belgílengen rásímderdíń saqtaluy turaly másele kóteríldí.
Almaty qalasy Sáulet, qala qūrylysy basqarmasynyń basshysy Almas Jańbyrshynyń aıtuynsha, qoǵamdyq talqylaular Qazaqstan Respublıkasy Industrıya jáne ınfraqūrylymdyq damu mınıstríníń 2020 jyly 30 qyrkúıektegí №505 būıryǵymen bekítílgen «Qala qūrylysy jobalaryn (eldí mekenderdíń bas josparlary, egjeı-tegjeılí josparlau jobalary jáne qūrylys jobalary) ázírleu, kelísu jáne bekítu qaǵıdalaryna» (būdan árí – Qaǵıdalar) sáıkes ótkízíledí.
«Qaǵıdalarǵa sáıkes, qoǵamdyq talqylaular ótkízu kúní ashyq jınalys túrínde būqaralyq aqparat qūraldarynda habarlandyru jarıyalanǵan kúnnen bastap kemínde jıyrma kúntízbelík kúnnen keıín belgílenuge tıís. Bíz 25 qarashada Almaty qalasynyń Bas josparyn túzetu jobasy boıynsha qoǵamdyq talqylaulardyń 24-26 jeltoqsan aralyǵynda ótetíní turaly resmı túrde jarıyaladyq. Sonymen qatar, basqarmanyń saıtynda túzetu jobasy jarıyalandy, onymen kez kelgen adam tanysa aldy. Aıta ketu kerek, jobanyń ózí qansha uaqytqa jarıyalanuǵa tıís ekení Qaǵıdalarmen naqty rettelmegen», – dedí ol.
Bas sáuletshí qoǵamdyq talqylaular turaly habarlandyruda barlyq qajettí aqparat kórsetílgenín aıtty. Atap aıtqanda, qosymsha málímet aluǵa, josparlanǵan talqylauǵa qatysty qūjattardyń kóshírmesín sūratuǵa bolatyn elektrondy poshta men telefon nómírí bar.
«Rásímderdíń saqtaluyna qatysty eskertulerden keıín barlyq qaǵıdany qaıta qarap, zań talaptarynyń tolyq saqtalǵanyna kóz jetkízdík. Sol sebeptí, qazírgí tańda qoǵamdyq talqylaulardy būryn belgílengen merzímde ótkízíp jatyrmyz», – dedí Almas Jańbyrshy.