Almaty qalasynda mektep jasyndaǵy balalar arasynda durys tamaqtaný mádenıetin qalyptastyrý jáne salaýatty ómir saltyn nasıhattaýǵa arnalǵan forýmy uıymdastyryldy.
«Balam – eń basty jobam» atty forýmǵa ata-analar, muǵalimder, dárigerler, nýtrısıologtar jáne sala mamandary qatysty, - dep habarlaıdy Aqshamnews.kz.
Forýmdy FAO-nyń Qazaqstandaǵy salaýatty tamaqtaný jónindegi jobasynyń menedjeri Raýan Erulan ashty. Ol balalardyń jastaıynan durys tamaqtaný ádetteri men mádenıetin qalyptastyrýdyń mańyzyna kóbirek toqtaldy.
«Salaýatty tamaqtaný daǵdylaryn erte jastan qalyptastyrý bolashaqqa salynǵan ınvestısıa. Balalar tamaqtyń olardyń kóńil kúıine, densaýlyǵyna jáne oqý úlgerimine tikeleı áser etetinin túsingende, óz rasıonyna sanaly túrde mán berip, paıdaly tańdaý jasaýdy úırenedi», — dedi Raýan Erulan.
Mamandardyń aıtýynsha, balanyń tolyqqandy damýy úshin 8–10 saǵattyq sapaly uıqy, turaqty dene belsendiligi jáne quramynda qajetti qorektik zattary bar paıdaly taǵam asa mańyzdy. Aıta keteıik, bala bolashaǵyna arnalǵan sharaǵa Almaty mektepterinen 100-den astam ata-anasy qatysty. Sharanyń negizgi maqsaty qunarly ári teńgerimdi tamaqtanýdyń mańyzdylyǵyn nasıhattaý.
Forým barysynda sarapshylar Qazaqstannyń Ortalyq Azıa elderi arasynda balalar semizdigi boıynsha joǵary kórsetkishterdiń birine ıe ekenine nazar aýdardy. Mamandardyń pikirinshe, munyń negizgi sebepteriniń biri, ásirese12 jastan asqan jasóspirimder arasynda tátti gazdy sýsyndardy shamadan tys tutynylýy. Sonymen qatar, kóptegen balalardyń kúndelikti rasıonynda mańyzdy qorektik zattardyń tapshylyǵy baıqalady. Qazaqstannyń agroazyq-túlik júıesin turaqty damytýda ilgerileý bar bolǵanymen, qoǵamdyq densaýlyq pen tamaqtaný salasyndaǵy máseleler ózekti kúıinde qalyp otyr.
Bul máselelerdi sheshý úshin FAO «Salaýatty tamaqtanýdy damytý jáne aýqymyn keńeıtýge úles qosý» atty pılottyq jobasyn iske asyrýda. Joba aıasynda Qazaqstan úkimetine tehnıkalyq qoldaý kórsetilip, mektep tamaqtanýynyń jańartylǵan standarttary engizilýde, áleýmettik zertteýler júrgizilip, oqý oryndarynda pılottyq baǵdarlamalar iske asyrylýda.