Balalardy qorǵaý – bizdiń basty basymdyqtarymyzdyń biri. Memleket basshysy balalardyń qaýipsizdigin qamtamasyz etý, olardyń quqyqtaryn qorǵaý jáne úılesimdi damýyna qolaıly jaǵdaı jasaý – memlekettik saıasattyń asa mańyzdy baǵyty ekenin atap ótti.
Osyǵan baılanysty meniń tapsyrmam boıynsha 2023–2025 jyldarǵa arnalǵan balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men ál-aýqatyn qamtamasyz etý jónindegi Keshendi josparǵa kámeletke tolmaǵandardy ınternettegi destrýktıvti kontenttiń zıandy áserinen qorǵaýǵa baǵyttalǵan usynystar ázirlendi. Qazirgi ýaqytta bul usynystar Úkimettiń qaraýynda.
Biz óz tarapymyzdan bul sharalardy júzege asyrýǵa kiristik.
Máselen, Almaty qalasynda prokýratýra TELE2/ALTEL baılanys operatorymen birigip, «SIM KIDS» atty pılottyq jobany iske qosty. Bul – sýısıdti nasıhattaý, pornografıa, esirtki, onlaın-kazıno jáne ózge de ınternet-qaterlerden qorǵaıtyn arnaıy balalarǵa arnalǵan sım-karta.
Osy sım-kartanyń kómegimen ata-analar balasynyń qandaı qosymshalardy paıdalanyp júrgenin baqylap, zıandy saıttarǵa qoljetimdilikti shektep, qurylǵy únsiz rejımde bolsa da, balasyna qońyraý shala alady.
Joba ata-analar arasynda úlken qyzyǵýshylyq týdyrdy. Synaq kezeńi aıaqtalǵannan keıin bul sım-karta barshaǵa qoljetimdi bolady.
Balalarǵa qaýipsiz orta qalyptastyrý jumysy aldyn ala júrgizilýi tıis.
Bala sıfrlyq keńistikte sýısıdke ıtermeleıtin qaýipti oıyndardan, qumar oıyndarǵa táýeldilikten, sondaı-aq psıhıkasyna zıan keltiretin jáne otbasylyq tárbıe men qundylyqtarǵa degen kózqarasyn burmalaýy múmkin kez kelgen jaǵymsyz kontentten qorǵalýy tıis.
Eń bastysy – balanyń qaýipsizdigi otbasyndaǵy kóńil bólýden bastalady. Eresekter balalardyń kóńil kúıindegi, ortasyndaǵy jáne qyzyǵýshylyqtaryndaǵy ózgeristerge sezimtal bolǵany jón.