Kórme 2026 jylǵy 12 jeltoqsanǵa deıín jalǵasady, dep habarlaıdy aqshamnews.kz tílshísí.
Ázírbaıjannyń Ūlttyq tarıh muzeıínde Qazaqstan Respublıkasy Ūlttyq ortalyq muzeıíníń qor kollektsıyalary negízínde ázírlengen «Qazaqtyń dástúrlí mádenıetí» atty halyqaralyq kórmeníń saltanatty ashylu rásímí óttí.
Kórme Qazaqstannyń tarıhı-mádenı mūrasyn Ázírbaıjanda keńínen nasıhattau, ekí el arasyndaǵy mádenı-gumanıtarlyq baılanystardy nyǵaıtu jáne halyqaralyq muzeı yntymaqtastyǵyn odan árí damytu maqsatynda ūıymdastyryldy.

Kórmege Qazaqstan Respublıkasy Ūlttyq ortalyq muzeıíníń qorynan alynǵan qazaq halqynyń dástúrlí ómír saltyn, tūrmys-tírshílígín, sharuashylyq qyzmetí men qolóner dástúrlerín tanytatyn 69 etnografıyalyq jádíger qoıylǵan.
Ekspozıtsıya kelushílerdí qazaq halqynyń san ǵasyrlyq kóshpelí mádenıetímen jáne Ūly dalanyń baı etnomádenı mūrasymen tanystyrady. Kórmeden kúndelíktí tūrmys pen sharuashylyqqa qajettí būıymdardy, at ábzelderín, zergerlík áshekeılerdí, kıíz basu jáne toqymashylyq óneríníń úlgílerín, dástúrlí kıímder men ūlttyq áshekeılerdí kóruge bolady.

Kórme bes taqyryptyq bólímnen tūrady. Onda ūsynylǵan muzeılík jádígerler qazaq halqynyń ómír saltyn, materıaldyq jáne ruhanı qūndylyqtaryn, estetıkalyq talǵamy men ūrpaqtan ūrpaqqa jalǵasyp kele jatqan qolóner dástúrlerín jan-jaqty tanytady. Árbír jádíger – ǵasyrlar boıy kóshpelí ómír saltynyń yqpalymen qalyptasqan halyqtyń tarıhı damuy men mádenı erekshelíkteríníń aıǵaǵy.
Kórmeníń ashylu saltanatynda Ázírbaıjannyń Ūlttyq tarıh muzeıíníń dırektory, akademık Naılya Velıhanly, Qazaqstan Respublıkasy Ūlttyq ortalyq muzeıí dırektorynyń jalpy máseleler jóníndegí míndetín atqarushy orynbasary Asqar Ahmanov, Ázerbaıjan Respublıkasynyń mádenıet vıtse-mınıstrí Saadat Yusıfova, Qazaqstan Respublıkasynyń Ázerbaıjan Respublıkasyndaǵy Elshílígíníń keńesshísí Edíl Myrzahanov, Ázerbaıjannyń halyq jazushysy Elmıra Ahundova, sondaı-aq Túrkí mádenıetí jáne mūrasy qorynyń ókílí Leıla Gasanova sóz sóıledí.

Olar Qazaqstan men Ázírbaıjan arasyndaǵy tarıhı tamyrlastyq pen dástúrlí dostyq qarym-qatynastardy, mádenı-gumanıtarlyq yntymaqtastyqtyń qarqyndy damuyn atap óttí.
Sonymen qatar halyqaralyq kórme jobalarynyń ekí halyqtyń tarıhy men mádenıetín ózara tanytudaǵy, muzeıaralyq baılanystardy keńeıtudegí, bírlesken bastamalardy júzege asyrudaǵy jáne ortaq mádenı mūrany keler ūrpaqqa amanattaudaǵy mańyzyna erekshe nazar audaryldy.

Resmı bólímnen keıín qonaqtar kórme ekspozıtsıyasyn tamashalap, ūsynylǵan muzeılík jádígerlerdíń tarıhı jáne etnografıyalyq mańyzy turaly jan-jaqty málímet aldy.
«Qazaqtyń dástúrlí mádenıetí» halyqaralyq kórmesí – Qazaqstan men Ázírbaıjan arasyndaǵy mádenı dıalogty damytu jolyndaǵy mańyzdy oqıǵa. Atalǵan kórme ekí el muzeılerí arasyndaǵy kásíbı baılanystardy nyǵaıtuǵa jáne Ázerbaıjan jūrtshylyǵyn qazaq halqynyń baı tarıhı-etnografıyalyq mūrasymen keńínen tanystyruǵa yqpal etedí.
Kórme 2026 jylǵy 12 jeltoqsanǵa deıín jalǵasady.