Sońǵy jetí jylda 1 342 mektep salyndy, dep habarlaıdy aqshamnews.kz tílshísí.
Búgínde elímízde 8 myńnan astam mektep jūmys ísteıdí. Onyń 5 myńnan astamy auyldyq jerlerde ornalasqan. Sońǵy jetí jylda Qazaqstanda 1 mln astam oqushy ornyna arnalǵan 1 342 mektep salyndy. Būl mektepter jelísín keńeıtuge, qoldanystaǵy bílím beru ūıymdaryna túsetín júktemení azaıtuǵa, sondaı-aq úsh auysymdy jáne apatty mektepter máselesín kezeń-kezeńímen sheshuge múmkíndík berdí. Būl turaly QR oqu-aǵartu vıtse-mınıstrí Jaıyq Sharabasov málímdedí.
Úsh auysymdy jáne apatty mektepter máselesí
Vıtse-mınıstrdíń aıtuynsha, 2019–2026 jyldar aralyǵynda eldegí úsh auysymdy mektepter sany 5 ese, apatty mektepter sany 2 ese, al oqushy oryndarynyń jalpy tapshylyǵy 4 ese qysqarǵan.
Keleshek mektepterí ūlttyq jobasy
Sońǵy jyldardaǵy eń írí ınfraqūrylymdyq jobalardyń bírí – Memleket basshysynyń tapsyrmasymen júzege asyrylǵan «Keleshek mektepterí» ūlttyq jobasy.
«Joba ayasynda elímíz boıynsha 460 myń oqushy ornyna arnalǵan 217 mektep salyndy. Onyń 84-í auyldyq jerlerde ornalasqan. Barlyq mektep klımattyq jáne seısmıkalyq erekshelíkter eskeríle otyryp, jobalau, qūrylys jáne jabdyqtau talaptaryn qamtıtyn bíryńǵaı standart boıynsha salyndy. Būl írí qalalar men shalǵaı eldí mekenderdegí balalarǵa bírdeı bílím alu jaǵdaıyn jasauǵa, sondaı-aq qala men auyl mektepterí arasyndaǵy bílím sapasynyń alshaqtyǵyn qysqartuǵa múmkíndík berdí», – dedí Jaıyq Sharabasov.
Jańa mektepterdíń erekshelíkterí
Jańa mektepterdíń aumaǵy tıptík jobalarmen salystyrǵanda 15–20%-ǵa úlken. Ǵımarattarda bastauysh jáne joǵary synyp oqushylaryna arnalǵan aımaqtar bólek qarastyrylǵan. Būl balalardyń jas erekshelíkterín eskere otyryp, qauípsíz bílím beru ortasyn qalyptastyruǵa baǵyttalǵan.
«Keleshek mektepterí» jobasy ayasyndaǵy bílím beru ūıymdarynda erekshe bílím beru qajettílíkterí bar balalar úshín kedergísíz orta qalyptastyrylǵan. Ǵımarattar lıftíler, pandustar jáne arnaıy baǵyttauyshtarmen jabdyqtalǵan. Sonymen qatar psıholog, logoped jáne defektolog kabınetterí bar. Būdan bólek, mektepterde fızıka, hımıya jáne bıologıya pánderíne arnalǵan zamanauı zerthanalar, STEM-synyptar men robototehnıka kabınetterí ashyldy.
«Ūlttyq jobany júzege asyru naqty nátıjeler berdí. Atap aıtqanda, 54 úsh auysymdy jáne 12 apatty mekteptíń máselesí sheshíldí. Sondaı-aq 100-den astam mekteptegí oqushy oryndarynyń tapshylyǵy azaıdy», – dep habarlady oqu-aǵartu vıtse-mınıstrí.
Qarjylandyru kózderí
Mektep qūrylysyn qarjylandyrudyń taǵy bír kózí – Memleket basshysynyń tapsyrmasynyń ayasynda 2023 jyly qūrylǵan Bílím beru ınfraqūrylymyn qoldau qory. Qor esebínen, onyń íshínde memleketke qaıtarylǵan sybaılas jemqorlyq aktıvterínen túsken qarjyǵa 100 myńǵa juyq oqushy ornyna arnalǵan 90 bílím beru nysanynyń qūrylysy qarjylandyryldy. Onyń 83-í paıdalanuǵa beríldí, qalǵan jeteuín jyl sońyna deıín ashu josparlanyp otyr.