Almaty ákimi Darhan Satybaldy 2025 jyldyń III toqsanynda «Taza Qazaqstan» ekologıalyq aksıasyn iske asyrý boıynsha keńes ótkizdi.
Ekologıa jáne qorshaǵan ortany qorǵaý basqarmasynyń basshysy Mıras Gaısın baıandaǵandaı, aksıa aıasynda sanıtarlyq tazalaý, kórkeıtý, kógaldandyrý, kóshe saýdasyn baqylaý jáne ekologıalyq bilim berý syndy 34 is-shara josparlanǵan. Qalada senbilikter uıymdastyrylyp, qoqys jáshikteri ornatylyp, jaryq tirekteri jýylyp, aǵashtar egilip jatyr. Jyl basynan beri @TazaQazBot arqyly 4100-den astam ótinish kelip tústi.
Aýdan ákimderi atqarylǵan jumystyń qorytyndysyn usyndy. Áýezov aýdanynda apta saıyn senbilikter ótedi, 1500-den astam aǵash otyrǵyzyldy, 10 myń tekshe metrden astam kógaldar abattandyryldy. Jetisý aýdanynda ózen arnalary tazartyldy, qoqys úıindileri joıyldy, beınebaqylaý kameralary ornatyldy. Túrksib aýdanynda 51 senbilik ótkizilip, 4,6 myń tonna qoqys shyǵaryldy, 66 jasyl aımaq abattandyryldy jáne negizgi kósheler boıynda kórkeıtý jumystary jalǵasýda.
«Ár keńes ótken saıyn jumysty bastaǵan ekensińder aıaǵyna deıin jetkizińder dep aıtyp kelemin. Qalada qazylǵan jerler jeterlik, ásirese jasyl aımaqtarda. Aýdan ákimderi muny jeke baqylaýda ustańyzdar», - dedi Darhan Satybaldy.
Qoǵamdyq damý basqarmasynyń basshysy Aıdar Esenbekov mektepterdegi tazalyq sabaqtarynan bastap etnomádenı birlestikterdi tartýǵa deıingi ekologıalyq mádenıetti qalyptastyrý sharalaryn atap ótti.
«Mektep, balabaqsha, aýrýhana jáne emhana syndy barlyq memlekettik mekeme aýmaǵynyń tazalyǵyn qadaǵalap otyrýǵa tıis. Ásirese, aýrýhanada jaǵdaı máz emes: las, aǵash qaraýsyz qaldy. Eger basshylar qarapaıym tazalyqty qalyptastyra almasa, onda jumys sapasy týraly ne aıtýǵa bolady?», - dedi qala ákimi.
Qala basshysy halyqpen tyǵyz baılanys ornatýdyń jáne aýdandar men tıisti qurylymdar arasyndaǵy úılesimniń mańyzdylyǵyn atap ótti.
«Qalany aralaǵanda búdjet aqshasyna salynatyn nysandardyń aılar boıy aıaqtalmaı turǵanyn kóremin. Bul belgilengen merzimdi kesheýildetedi, shyǵynǵa ákeledi jáne turǵyndardyń narazylyǵyn týdyrady. Mysaly, avtomatty sýarýdy alaıyq, onyń qubyrlary birneshe apta boıy jol boıynda jatady. Buǵan jol berýge bolmaıdy. Eger merdiger mindetin oryndaı almasa, onda kelisimshartty buzyńyz. Aýdan jumysyndaǵy eń ózekti másele - tazalyq, kógaldandyrý, jaryqtandyrý», - dedi qala ákimi.
Keńes qorytyndysy boıynsha Darhan Satybaldy ekologıa basqarmasyna aksıany iske asyrý jónindegi is-qımyl josparyn bekitýdi jáne onyń oryndalýyn baqylaýdy qamtamasyz etýdi, qoǵamdyq damý basqarmasyna - qala turǵyndaryna ekologıalyq bilim berýdi jandandyrýdy, al aýdan ákimdikterine uıymdardy tarta otyryp, senbilikterdi turaqty túrde ótkizýdi jáne jasyl jelekterge kútimdi kúsheıtýdi tapsyrdy. Sonymen qatar tazalyq ıdeologıasy qalany basqarýdyń kúndelikti tájirıbesine jáne ár turǵynnyń ómirine enýi kerek ekenin atap ótti.