Zań jobasyn ekinshi oqylymǵa daıyndaý barysynda depýtattar birqatar túzetý engizdi, dep habarlaıdy aqshamnews.kz
Atap aıtqanda, aýmaqtyq qorǵanystyń maqsaty men mindetteri, Úkimettiń, osy saladaǵy ýákiletti organnyń, ortalyq jáne jergilikti memlekettik organdardyń, sondaı-aq Qazaqstan Respýblıkasy Prezıdentine baǵynatyn jáne esep beretin memlekettik organdardyń quzyretteri naqtylandy. Sonymen qatar Májilis depýtattary zańdy eki jańa bappen tolyqtyrýdy usyndy.
Bul baptarda aýmaqtyq qorǵanys is-sharalary bekitilip, Aýmaqtyq qorǵanys josparyn ázirleý jáne bekitý tártibi aıqyndalady. Memlekettiń Qorǵanys josparynyń quramdas bóligi bola otyryp, bul jospar aýmaqtyq qorǵanysty júzege asyrýdaǵy negizgi qujatqa aınalmaq. Budan bólek glosarıge «aýmaqtyq qorǵanys nysany» uǵymy engizildi. Mundaı nysandardyń tizbesin bekitý quzyreti Úkimet pen jergilikti atqarýshy organdarǵa júkteledi.
Bul tizimniń aldyn ala bekitilýi Aýmaqtyq qorǵanys josparynda áskerı jáne memlekettik mańyzy bar nysandardy kúzetýge tartylatyn kúshter men quraldardy naqty belgileý úshin qajet. Aýmaqtyq qorǵanysty josparlaýǵa quqyq qorǵaý organdary da qatysady. Olar ózderine tıesili aýmaqtyq qorǵanys nysandaryn kúzetý jáne qorǵaý mindetterin atqarady.
Sondaı-aq «Qazaqstan Respýblıkasynyń keıbir zańnamalyq aktilerine kásipkerlik qyzmetti júrgizý máseleleri boıynsha ózgerister men tolyqtyrýlar engizý týraly» Zańnyń tujyrymdamasyna sáıkestendirý maqsatymen aýmaqtyq qorǵanys salasynda memlekettik baqylaý júrgizý tártibi de belgilenetin bolady.