Almaty qalasyndaǵy №79 gımnazıyanyń oqushysy Dana Qadyrbek jas ónertapqysh retínde erekshe jobamen erekshelendí. Ol oılap tapqan qūrylǵy elektr jelísíne qosylmaı-aq jūmys ísteıdí, auadaǵy ylǵaldy tıímdí síńíríp, ony kondensatsıyalau arqyly taza suǵa aınaldyrady. Oqushynyń ónertabysy jaıly Aqshamnews.kz tílshísí tolyǵyraq bayandaıdy.
Dananyń būl ınnovatsıyasy ásírese su tapshylyǵy baıqalatyn shalǵaı aımaqtar úshín taptyrmas sheshím bolyp otyr.
Oqushynyń būl ónertabysyna Su resurstary jáne ırrıgatsıya mınıstrí Nūrjan Nūrjígítovtyń ózí qyzyǵushylyq bíldírgen. Vedomstvo basshysynyń aldynda ol ózíníń jobasyn tanystyryp ta úlgergen. Kezdesu qorytyndysy boıynsha mınıstrlík pen jas ónertapqysh jobany pılottyq rejımde íske asyru, qūrylǵyny tájírıbelík synaqtan ótkízu, aqparat pen derekter almasu baǵytynda memorandumǵa qol qoıdy.
Suret: Gov.kz.
Mınıstrdíń aıtuynsha, daryndy jastardyń su únemdeu máseleleríne beı-jaı qaramaı, ǵylymı tūrǵydan tyń sheshímder ūsynuy quantady.
"Būl jobany bíz būrynnan baqylap kelemíz. Qūrylǵynyń ylǵal az jaǵdaıda da atmosferadan su jınaı aluy onyń praktıkalyq mańyzyn arttyrady. Zamanauı nanomaterıaldar men kún energıyasyn qoldanu jobany naǵyz “jasyl” ınnovatsıyaǵa aınaldyrady", - dedí Nūrjan Nūrjígítov.
Dana Qadyrbektíń jobasy halyqaralyq jáne respublıkalyq deńgeıdegí baıqaularda joǵary baǵalandy. Ol Ońtústík Koreyada ótken WICO kórmesínde 36 elden kelgen 2000-nan astam qatysushy arasynan bírínshí oryndy jeńíp aldy. Sondaı-aq Indonezıyadaǵy Jastardyń halyqaralyq ǵylymı jármeńkesínde (YISF) 24 eldíń qatysushysy arasynan úzdík dep tanyldy. QazŪU halyqaralyq konferentsıyasy men Kazakhstan Smart Space ǵaryshtyq tehnologıyalar baıqauynda da júldelí oryndardan kóríndí.
Joba Bíríkken Ūlttar Ūıymynyń Ónerkásíptí damytu ūıymymen (UNIDO) bírlesíp júzege asyrylatyn Global Cleantech Innovation Programme (GCIP) baǵdarlamasynyń on jartylaı fınalısíníń qataryna endí. Qazaqstan boıynsha 500-den astam ótíním arasynan íríktelíp alynǵan būl jobanyń halyqaralyq deńgeıde de tanymaldylyǵy aıqyn.
Mınıstrmen ótken kezdesuden alǵan áserín Dana Qadyrbek bylaı dep bólístí:
"Mınıstrlík tarapynan kórsetílgen qoldau men úshín úlken motıvatsıya boldy. Endí qūrylǵyny dalalyq jaǵdaıda synaqtan ótkízíp, jobany pılottyq rejımde íske asyru múmkíndígíne ıe bolamyz", - dedí jas ónertapqysh.
Būl joba tek Qazaqstan úshín ǵana emes, álemdík deńgeıde de "jasyl" tehnologıyalardyń damuyna úles qosatyn erekshe bastama bolyp otyr.