Atyrau oblysynda qaıyn ata-enesín óltírdí degen kúdíkke ílíngen Sūltan Sársemálıevke ízdeu jarıyalandy. Būl aqparat Bas prokuraturanyń qūqyqtyq statıstıka jáne arnaıy esepke alu organdarynyń portalynda shyqty, dep habarlaıdy Aqshamnews.kz tílshísí.
Sūltan Sársemálıevke qatysty ízdestíru ísí 8 qańtarda Atyrau oblysynda tírkelgen. Ízdeudí bastaǵan – Íshkí íster mınıstrlígí, al ízdestíru jūmystaryn Atyrau oblystyq polıtsıya departamentí júrgízíp jatyr.
Jaǵdaıdyń jaı-japsary
66 jastaǵy Maqsot Qarabalın men 64 jastaǵy Násíp Óteshqalıeva Atyrau oblysyndaǵy Jangeldın auylynda tūrǵan. Tuystarynyń aıtuynsha, erlí-zaıypty úshínshí top múgedektígí bar jandar bolǵan, mal sharuashylyǵymen aınalysqan jáne tuǵan auylynan kóp shyqpaǵan. Olardyń úsh balasy bar: ekí qyzy jáne bír ūly.
25 jeltoqsan 2025 jyly óńírlík polıtsıyaǵa tuystarynan búkíl otbasynyń joǵalǵany turaly habar túsken. Qūqyq qorǵau organdarynyń málímetínshe, jergílíktí tūrǵyn áıel aryz jazyp, aǵasy, onyń jūbaıy jáne ekí eresek balasy – 32 jastaǵy ūly Nauryz ben 35 jastaǵy qyzy Meıramgúldíń qarasha aıynan berí baılanysqa shyqpaı júrgenín aıtqan.
Keıín anyqtalǵandaı, otbasy úıden belgísíz baǵytqa shyǵyp ketken, sodan berí olardyń qaıda ekení jónínde esh aqparat bolmaǵan.
Polıtsıya ízdeu jarıyalaǵan tórt eresek adam:
-
otbasy otaǵasy;
-
onyń jūbaıy;
-
32 jastaǵy ūly;
-
35 jastaǵy qyzy.
Joǵalǵan erlí-zaıyptynyń máıítí tabyldy
6 qańtarda polıtseıler zeınetker erlí-zaıyptynyń máıítín tapqan. Osydan keıín qūqyq qorǵau organdary qylmystyq ís qozǵady.
Áleumettík jelíde marqūmdardyń denesí óz úıleríníń aulasyndaǵy qoranyń edeníníń astynan tabylǵany jónínde aqparat tarady. Alaıda qūqyq qorǵau organdary būl málímetke ázírge túsíníkteme bermegen.
8 qańtarda erlí-zaıyptyny sońǵy saparǵa shyǵaryp salu rásímí óttí. Jerleu Atyrau oblysy Qyzylqoǵa audanyna qarasty Jangeldın auylynda boldy. Marqūmdarmen qoshtasuǵa auyl tūrǵyndary kóp jınalǵan. Oqıǵa ornynan vıdeony otbasynyń qūdasy árí auyldasy bólísken. Olardy tanyǵandar Maqsot Qarabalın men Násíp Óteshqalıevany qarapaıym, momyn, elge syıly adamdar bolǵanyn aıtady.
Sonymen qatar taǵy ekí adamnyń – otbasynyń úlken qyzy men ortańǵy ūlyn ízdeu jūmystary álí de jalǵasyp jatyr.
Otbasynyń kíshí qyzy qaıda? Polıtsıya ne deıdí
Qazaqstandyqtardy tolǵandyrǵan negízgí sūraqtardyń bírí – otbasynyń kíshí qyzynyń qaıda ekení boldy.
"Úlken qyzy men ūly 25 jeltoqsannan berí ízdeude. Otbasynyń kíshí qyzy men kúıeu balasy elden tys jerde ekení anyqtaldy. Alaıda tuystarynan olardyń joǵalǵany turaly aryz túsken joq. Soǵan qaramastan, qūqyq qorǵau organdary tıístí tekseru sharalaryn bastady", – delíngen Atyrau PD jauabynda.
Polıtsıya málímetínshe, kúıeu balasy men kíshí qyzdarynyń bes balasy bar. Qazírgí tańda balalar kúıeu balasynyń tuystarynyń qarauynda.
Sonymen bírge polıtsıya kíshí qyzdyń būl ís boıynsha mártebesí "kúdíktí" retínde qarastyrylmaıtynyn naqtylady.
Basty kúdíktí kím: polıtsıya jáne tuystar boljamy
8 qańtarda polıtsıya Atyrau oblysy Mahambet audanynyń 29 jastaǵy tūrǵynyn resmı túrde ízdeuge jarıyalady. Tergeu nūsqasyna sáıkes, qylmysqa osy adamnyń qatysy boluy múmkín. Qazír qūqyq qorǵaushylar onyń sybaılastary bar-joǵyn da tekseríp jatyr.
Alaıda ol kezde polıtsıya kúdíktí adamnyń otbasynyń kúıeu balasy ekenín naqtylamaǵan.
Al marqūmdardyń tuystary kúdíktí retínde dál kúıeu balany ataıdy. Qaza tapqandardyń tuysy Ásel Mūqanǵalıeva kíshí qyz ben onyń kúıeuí kórshí Mahambet auylynda tūrǵanyn aıtqan.
Tuysynyń sózínshe, kúıeu bala joǵalǵandardy sońǵy kórgen adam boluy múmkín:
"Auyl tūrǵyndary kúıeu balanyń íním men síńlímdí taksıge otyrǵyzyp, alyp ketkenín kórgenín aıtty. Sondyqtan bíz kúdíktí dep – kúıeu balamyzdy oılaımyz. Ol jalǵyz áreket etpegen boluy múmkín, basqa adamdar da boluy yqtımal", – degen Ásel Mūqanǵalıeva.
Onyń aıtuynsha, būǵan deıín erlí-zaıypty men kúıeu bala arasynda úlken kıkíljíń bolmaǵan, otbasynyń basqa múshelerímen de eleulí janjal tírkelmegen.
Sondaı-aq Mūqanǵalıeva keı tuystarynyń aıtuynsha, kíshí qyz ben kúıeu bala bosanǵannan keıíngí depressıyany emdetu úshín Atyrauǵa ketken boluy múmkín degen boljam baryn jetkízdí. Būl aqparattyń resmı rastamasy joq.