Májilis depýtaty Maqsat Tolyqbaı jalǵan ataq pen medal taratýdy "qaýipti dertke" teńep, Úkimetten naqty ári qatań sharalar qabyldaýdy talap etti. Depýtattyń aıtýynsha, keıingi jyldary ataq-marapat "taýarǵa" aınalyp, onyń saldary ásirese bilim berý salasyna ótip barady. Osy taqyrypqa baılanysty Aqshamnews.kz redaksıasy oqyrmandar arasynda "ataq satyp alý" týraly saýalnama júrgizip kórdi.
Depýtat premer-mınıstrdiń orynbasary – mádenıet jáne aqparat mınıstri Aıda Balaeva atyna joldaǵan depýtattyq saýalynda marapat ınstıtýtynyń bedeli qunsyzdanyp bara jatqanyn atap ótti. Onyń sózinshe, aty-jóni beımálim qoǵamdyq uıymdar túrli orden-medal, ataqtardy ashyq ne jasyryn túrde satyp, tipti saltanatty shoýǵa aınaldyryp otyrǵan kórinedi.
"Ataǵy joq, medal almaǵan kim qaldy? Ataqqumarlyq kádimgi dertke aınalyp barady. Marapat pen ataq – bazarda satylatyn sývenır sıaqty", – dedi depýtat.
Saýalda keltirilgen málimetterge sáıkes, "Qazaqstannyń qurmetti azamaty", "Qazaqstannyń eńbek sińirgen qyzmetkeri", "Ult ustazy" sekildi ataqtar 20 myńnan 100 myń teńgege deıin "baǵalanyp", tólegen adamǵa medal, orden, kýálik jáne sahnalyq marapattaý rásimi qosa usynylatyn jaǵdaılar aıtylǵan.
Aqshamnews saýalnamasy: oqyrman kózqarasy qandaı?
Osy taqyryp qoǵamda qyzý talqylanyp jatqandyqtan, Aqshamnews.kz áleýmettik jelidegi oqyrmandar arasynda "ataq satyp alý" máselesine qatysty shaǵyn saýalnama júrgizdi.
"Sizge nemese tanysyńyzǵa “aqshaǵa ataq/medal alý” týraly usynys jasaldy ma?"
- Iá, ózime tikeleı usynys boldy - shamamen 18%
- Iá, tanystarymnan estidim - shamamen 42%
- Joq, kezdestirmedim - shamamen 40%
"Qoǵamdyq uıymdardyń “marapat taratýyna” zańmen shekteý engizgen durys pa?"
- Iá, qatań baqylaý qajet - shamamen 74%
- Retteý kerek, biraq tolyq tyıym bolmasyn - shamamen 19%
- Qajet emes, árkim ózi biledi - shamamen 7%
"Jalǵan marapattyń eń zıan salasy qaısy?"
- Bilim berý (muǵalim mártebesi, báseke) - shamamen 46%
- Memlekettik marapat bedeliniń túsýi - shamamen 33%
- Qoǵamdyq sana, “kózboıaýshylyq” mádenıeti - shamamen 21%
"Adam ne úshin ataq satyp alady dep oılaısyzdar?"
- Iá, aıyppul/ákimshilik jaza bolýy tıis - shamamen 52%
- Iá, qylmystyq jaýapkershilikke deıin qatańdatý kerek - shamamen 28%
- Tek túsindirýmen shektelgen durys - shamamen 20%
Depýtat usynǵan naqty sharalar
Depýtat Úkimetke birneshe baǵytta qatań tetikter kerek ekenin jetkizdi:
- 2025 jylǵy maýsymda qabyldanǵan zańnamalyq ózgeristerdiń tolyq ári tıimdi oryndalýyn qamtamasyz etý;
- Qoǵamdyq marapattardy zańsyz taratý faktileri boıynsha ákimshilik jáne ózge de quqyqtyq sharalardy júıeli qoldaný;
- Memlekettik jáne qoǵamdyq nagradalardyń biryńǵaı sıfrlyq tirkelimin engizip, ashyqtyq pen baqylaýdy kúsheıtý.