Jarlyqtyń negízgí maqsaty – jasandy ıntellekt jedel damyp kele jatqan kezeńde Qazaqstan Respublıkasynyń órkendeuín qamtamasyz etíp, adamı kapıtaldy ílgeríletuge úles qosatyn zamanauı, ınnovatsıyalyq bílím beru júıesín qalyptastyruǵa jaǵdaı jasau, – dep habarlaıdy aqshamnews.kz tílshísí Aqordaǵa sílteme jasap.
Jarlyqqa sáıkes Qazaqstan Respublıkasynyń Úkímetí 2026 jyldyń 1 shíldesíne deıín derbes oqytu tetígín, tsıfrlyq ınfraqūrylymdy, pedagog kadrlar dayarlaudy, bílím alushylardyń jeke málímetterín qorǵaudy kózdeıtín Orta bílím beru júıesíne jasandy ıntellektíní engízudíń 2026-2029 jyldarǵa arnalǵan keshendí ís-sharalar josparyn bekítedí.
Jarlyqta Jasandy ıntellektíní damytu jóníndegí keńestíń múshesí Lı Kaı-Fudíń ūsynymdaryn jūmys barysynda qoldanu qarastyrylǵan. Úkímet qala men auyl mektepterí arasynda bílím beru sapasynyń alshaqtyǵyn qysqartu maqsatynda 2026 jyldyń 1 mausymyna deıín orta bílím beru salasyndaǵy pılottyq jobany íske asyru, ony odan árí keńínen taratu jónínde naqty ūsynystar engízuge tıís.
2026 jyldyń 1 tamyzyna deıín pılottyq jobany íske asyru ayasynda mektepter tehnıkalyq tūrǵydan jaraqtandyrylady, sonyń íshínde tūraqty, jyldamdyǵy joǵary ınternetpen qamtamasyz etíledí.
2026 jyldyń 1 qyrkúıegíne deıín orta bílím beru júıesínde jasandy ıntellektíní qoldanu standarttary bekítíledí.
Sondaı-aq 2026 jyldyń 1 qyrkúıegíne deıín pedagogterdíń kásíbı tūrǵydan úzdíksíz damuyn kózdeı otyryp, olardyń qyzmetíne nūqsan keltírmeı árí almastyrmaı jasandy ıntellekt tehnologıyalaryn bílím beru protsesínde qosymsha tıímdí qūral retínde paıdalanudy qamtamasyz etetín sharalar jospary qabyldanady.
Qazaqstan Respublıkasynyń orta bílím beru júıesíne jasandy ıntellektíní endíru jóníndegí sharalar turaly
2026 jylǵy 12 mamyr
Qazaqstan Respublıkasynda jasandy ıntellektíníń qarqyndy damuy jaǵdaıynda jáne adamı kapıtaldyń negízgí elementí retínde zamanauı, ınnovatsıyalyq bílím beru júıesín qalyptastyrudyń shūǵyl qajettílígín negízge ala otyryp, QAULY ETEMÍN:
1. Qazaqstan Respublıkasynyń Úkímetí:
1) 2026 jylǵy 1 shíldege deıín orta bílím beru júıesínde jasandy ıntellektíní keńínen engízuge baǵyttalǵan, derbes oqytu tetígín, tsıfrlyq ınfraqūrylymdy, pedagog kadrlar dayarlaudy, bílím alushylardyń derbes derekterín qorǵaudy kózdeıtín Orta bílím beru júıesíne jasandy ıntellektíní engízudíń 2026 – 2029 jyldarǵa arnalǵan keshendí ís-sharalar josparyn (būdan árí – Keshendí jospar) bekítsín;
2) qalalyq jáne auyldyq mektepter arasynda bílím beru sapasyndaǵy alshaqtyqty qysqartu maqsatynda Jasandy ıntellektíní damytu jóníndegí keńestíń múshesí Lı Kaı-Fudíń ūsynymdaryn 2026 jylǵy 1 mausymǵa deıín ís júzínde qoldanyp, orta bílím beru salasyndaǵy pılottyq jobany íske asyru, odan árí keńínen qoldanu jónínde naqty ūsynystar engízsín;
3) 2026 jylǵy 1 tamyzǵa deıín pılottyq jobany íske asyru sheńberínde tūraqty, jyldamdyǵy joǵary ınternettíń boluyn qosa alǵanda, mektepterdíń tehnıkalyq jaraqtandyryluyn qamtamasyz etsín;
4) 2026 jylǵy 1 qyrkúıekke deıín bílím beru kontentín generatsıyalaudy jáne oqu nátıjelerín baǵalaudy, sondaı-aq bílím beru mekemelerínde jasandy ıntellekt qūraldaryn paıdalanudy retteu maqsatynda akademıyalyq adaldyqqa kepíldíkter berudí qosa alǵanda, orta bílím beru júıesínde jasandy ıntellektíní qoldanu standarttaryn bekítsín;
5) 2026 jylǵy 1 qyrkúıekke deıín pedagogterdíń úzdíksíz kásíptík damuyn kózdeıtín jáne jasandy ıntellekt tehnologıyalaryn pedagogterdíń kásíptík qyzmetíne nūqsan keltírmeı jáne ony almastyrmaı bílím beru protsesínde qosymsha tıímdí qūral retínde paıdalanudy qamtamasyz etetín sharalar josparyn bekítsín;
6) orta bílím beru ūıymdaryndaǵy derbes derekterdí qorǵaudy kúsheıtu jáne bílím beru kontentíníń Qazaqstan Respublıkasynyń memlekettík jalpyǵa míndettí bílím beru standartynyń talaptaryna sáıkestígín qamtamasyz etu jónínde sharalar qabyldasyn.
2. Astana, Almaty, Shymkent qalalarynyń jáne oblystardyń ákímdíkterí:
1) 2026 jylǵy 1 tamyzǵa deıín Keshendí josparmen úılestírílgen, orta bílím beru júıesíne jasandy ıntellektíní endíru jóníndegí óńírlík josparlardy bekítsín;
2) pılottyq jobany jáne Keshendí jospardy íske asyru maqsatynda ūıymdastyrushylyq jáne ózge de ís-sharalardy qabyldasyn.
3. Osy Jarlyqtyń oryndaluyn baqylau Qazaqstan Respublıkasy Prezıdentíníń Ákímshílígíne júktelsín.
4. Osy Jarlyq qol qoıylǵan kúnínen bastap qoldanysqa engízíledí.
Qazaqstan Respublıkasynyń
Prezıdentí Q.Toqaev
Astana, Aqorda, 2026 jylǵy 12 mamyr
№ 1274