Elordada 22 tamyz kúni jastarǵa arnalǵan elimizdegi eń aýqymdy bos jumys oryndary jármeńkesi ótedi. İs-shara Jumysshy mamandyqtary jyly aıasynda uıymdastyrylyp otyr.
Jármeńke «AMANAT» partıasynyń «Jastar Rýhy» jastar qanaty men Astana qalasy ákimdiginiń qoldaýymen ótedi. Uıymdastyrýshylardyń aıtýynsha, negizgi maqsat – jastarǵa laıyqty jumys tabýǵa múmkindik jasaý, olardyń kásibı áleýetin damytý jáne eldiń adamı kapıtalyn arttyrý.
Shara E. Rahmadıev atyndaǵy memlekettik akademıalyq fılarmonıa ǵımaratynda (Kenesary kóshesi, 32) ótpek.
Jármeńke jastar men jumys berýshilerdiń tikeleı dıalog alańyna aınalyp, eńbek naryǵyndaǵy jańa múmkindikterdi ashady. Munda 70-ten astam iri jumys berýshi 1000-nan asa bos jumys ornyn usynady.
Qatysýshylardyń arasynda elimizdiń jetekshi kompanıalary bar. Atap aıtqanda:
- «KEGOC» AQ,
- «Qazaqtelekom» AQ,
- «DAR RAIL» JSHS,
- «Home Credit Bank» AQ,
- «Qazmedıa ortalyǵy» AQ,
- «Bogatyr Kómir» JSHS,
- «Qazposhta» AQ,
- Qazaqstan Halyq Banki» AQ,
- Astana Hub jáne basqa da uıymdar.
Uıymdastyrýshylardyń pikirinshe, jármeńkeniń ótkizilýi júzdegen jas qazaqstandyqty jumyspen qamtýǵa jol ashady. Sonymen qatar, bul shara jumysshy mamandyqtarynyń mártebesin arttyrýǵa, básekege qabiletti urpaq tárbıeleýge jáne el ekonomıkasyn damytýǵa yqpal etpek.