Astanada er adam áıeldi kóliginiń júksalǵyshynda tasymaldaǵany úshin ákimshilik jazaǵa tartylyp, ýaqytsha ustaý ızolátoryna qamaldy, dep habarlaıdy Aqshamnews.kz. Bul oqıǵaǵa baılanysty beınejazba áleýmettik jelide tarady.
Vıdeoda er adamnyń kólik júk salǵyshynda jatqan áıelmen sóılesip turǵany, keıinnen júksalǵyshty jaýyp, kólikke minip ketkeni kórinedi.
"Aýlada urysyp turdy, áıel júksalǵyshqa ózi minip alǵan", – delingen vıdeonyń astynda.
Oqıǵa 14 shildede Astananyń Saryarqa aýdanynda bolǵan. Qalalyq polısıa departamentiniń habarlaýynsha, quqyqbuzýshy anyqtalyp, ákimshilik jaýapkershilikke tartylǵan.
"Osy quqyqbuzýshylyqty jasaǵany úshin sot ákimshilik jaza taǵaıyndady. Qazir quqyqbuzýshy Astana qalalyq polısıa departamentiniń ákimshilik qamaýǵa alynǵan tulǵalarǵa arnalǵan arnaıy ýaqytsha ustaý ızolátoryna qamaldy", – delingen Saryarqa aýdandyq polısıa bóliminiń habarlamasynda.