Qazaqstanda onlaın-platformalar men būqaralyq aqparat qūraldaryn retteuge ózgerís engízetín zań jobasy ázírlenude, dep habarlaıdy aqshamnews.kz
«Ashyq NQA» portalynda jarıyalanǵan qūjat 29 jeltoqsanǵa deıín qoǵamdyq talqylauǵa ūsynylǵan.
Mádenıet jáne aqparat mınıstrlígí zańnamany jańartudy jáne zańǵa qaıshy kontentke qarsy sharalardy kúsheıtudí ūsynǵan. Máselen, tanymal anonımdí Telegram-arnalardyń ıelerín óz jeke basyn jarıya etuge míndetteu qarastyrylǵan.
«Joba onlaın-platformalarda bes myńnan astam jazylushysy bar anonımdí paıdalanushylardyń tízímín engízudí kózdeıdí. Mūndaı akkaunttardyń ıelerí uákílettí organǵa ózderín sáıkestendíruge múmkíndík beretín derekterdí ūsynuǵa míndettí. Derekter tízbesín mınıstrlík aıqyndaıdy», – delíngen joba mátínínde.
Qūjatta memlekettík organdardyń resmı jauaptaryn arnaıy belgíleu tártíbí, audıovızualdy platformalardyń jańa jūmys erejelerí, operatorlardy lıtsenzıyalau, kontent ornalastyru talaptary jáne retteushíníń ókílettígín keńeıtu tárízdí normalar qamtylǵan.
Jobaǵa engízílgen jeke norma 16 jasqa tolmaǵan balalardyń áleumettík jelílerde tírkeluíne tyıym saludy ūsynady.
Sonymen bírge zań jobasynda ákímshílík jauapkershílíkke qatysty erejeler bar. Zańsyz foto-vıdeo taratqan úshín 200 AEK-ke deıín aıyppūl salu qarastyrylǵan. Onlaın-platformalarda nemese būqaralyq aqparat qūraldarynda balaǵat sózder qoldanǵany úshín 20 AEK aıyppūl nemese 15 táulíkke deıín ákímshílík qamau jazasy kózdeledí.
Būǵan deıín mádenıet jáne aqparat mınıstrí Aıda Balaeva anonımdí Telegram-arnalardy synǵa alǵan bolatyn. Onyń aıtuynsha, kóptegen platformalar jalǵan aqparat pen pornografıya jarıyalaıdy.
Qūqyq qorǵaushylar men azamattyq qoǵam ókílderí Qazaqstanda būqaralyq aqparat qūraldary men áleumettík jelíge qatysty bılíktíń baqylauy kúsheıgenín aıtady. Elde bılíktí synaıtyn jurnalıst, bloger, belsendílerdíń akkaunttery būǵattalyp, You Tube arnalary túrlí sebeppen jabylady. Jaqynda ǵana jurnalıst Ashat Nıyazov pen Vadım Boreıkonyń jáne sayası belsendí Sanjar Boqaevtyń Instagram paraqshalary óshírílgen.
