Almatyda alty balany tárbıelep otyrǵan Arman Bílál men Janar Seıílbekovanyń otbasy bıyl «Mereılí otbasy – 2026» ūlttyq baıqauynyń qalalyq kezeńínde úzdík atandy. Bıyl baıqauǵa Almatydan 262 otbasy qatysqan.
Otaǵasy Arman Bílál esepshí bolyp eńbek etedí. Al jary Janar Seıílbekova – qolóner sheberí árí alty balanyń anasy, «Kúmís alqa» ıegerí. Būl shańyraqta bala tárbıesínde eńbekqorlyqqa, jauapkershílíkke, ūlttyq qūndylyq pen salt-dástúrge erekshe mán beríledí. Balalary da sportpen aınalysyp, túrlí jarystarda júlde alyp júr.
Bílálovter úshín ūlttyq tárbıe tek sózben aıtylatyn ūǵym emes. Otbasy balalaryn qolónerge baulyp, qazaqtyń dástúrlí ónerín bírge dáríptep keledí. Olardyń «Jyldyń tórt mezgílín beıneleıtín syrly syrmaq» atty jūmysy 112 metrge jetíp, Global Book of Records rekordtar kítabyna engen. Sondaı-aq Nauryz merekesínde «Bıík, alyp, kıelí – Shańyraq» etnomádenı kompozıtsıyasyn kópshílíkke ūsynǵan.
– Bízdíń basty maqsatymyz – ata-babadan qalǵan ūlttyq qūndylyqtardy saqtap, keıíngí ūrpaqqa jetkízu, – deıdí otbasy múshelerí.
Alty balaly shańyraqtyń ónegesí otbasynyń berekesí tek bala sanymen emes, sol balalarǵa beríletín tárbıe, ortaq eńbek pen bír-bíríne degen qoldaumen ólshenetínín kórsetedí.
Aıta keteıík, Bílálovter otbasy endí Almaty atynan «Mereılí otbasy» baıqauynyń respublıkalyq kezeńíne qatysady.