Bírínshí synyptyń tabaldyryǵyn 80 oqushy attady, dep habarlaıdy aqshamnews.kz tílshísí.
Bílím kúní Túrksíb audanynda 600 oqushyǵa arnalǵan jalpy bílím beretín jańa №226 mektep ashyldy. Alǵashqy oqu kúní bírínshí synyptyń tabaldyryǵyn attaǵan 80 oqushy osy jańa mektepte bílím alatyn boldy. Saltanatty ís-sharaǵa qala ákímíníń orynbasary Oljas Smaǵūlov qatysyp, oqushylardy, ata-analar men ūstazdardy jańa oqu jylynyń bastaluymen qūttyqtady. Jalpy, 1 qyrkúıekte Almatynyń Alatau, Jetísu men Túrksíb audanynda 8 jańa mektep, Áuezov audanynda taǵy ekí balabaqsha ashyldy.
Jańa №226 mektepte tórt bírínshí synyp jasaqtaldy. Bírínshí synyp oqushylarymen bírge búgín joǵary synyp oqushylary da jańa oqu jylyn osyndaı jańa árí keń ǵımaratta bastady.
«Ár balanyń jarqyn bolashaǵyn qamtamasyz etu – bízdíń míndet. Osyǵan baılanysty Almatyda ár balanyń sapaly bílím aluyna, óz qabíletín ūshtauyna bar jaǵdaıdy jasap jatyrmyz. Bıyl qalada 10 myńnan astam oqushyǵa arnalǵan 8 jańa mektep paıdalanuǵa beríldí. Būl – bílím beru ınfraqūrylymyn damytyp, oqushy ornynyń tapshylyǵyn azaıtu baǵytynda jasalǵan mańyzdy qadam boldy», – deıdí sóz alǵan Oljas Smaǵūlov.
Mektep dırektory Gúlnara Sársenbaevanyń aıtuynsha, jańa mekteptíń ashyluy audandaǵy oqushy ornynyń tapshylyǵyn sheshuge yqpal etpek.
«Mektebímíz 600 oqushyǵa arnalǵan. Būl audandaǵy bar mektepke, onyń íshínde №398 ben №211 mektepke túsetín júktemení azaıtuǵa múmkíndík beredí. Mektep jaryq, keń árí zamanǵa saı etíp salynǵan. Mūnda balalardyń bílím aluyna barlyq jaǵdaı jasalǵan», – dedí mekteptíń dırektory.
Mektep zamandyq oqu kabınetímen, zerthanamen jabdyqtalǵan. Mūnda STEM-zerthana men robototehnıka kabınetí jūmys ísteıdí. Hımıya, fızıka men bıologıya kabınetí, sondaı-aq alǵashqy áskerı daıyndyq kabınetí tolyq jabdyqtalǵan. Dene shynyqtyru sabaǵyna arnalǵan ekí sport zaly taǵy bar. Onyń bírí úlken sport zaly da, ekínshísí bastauyshtaǵylarǵa arnalypty.
Mektepte mūǵalímder jaǵy jetkílíktí. Mamandardy jūmysqa alar kezde olardyń kásíbı tájírıbesí men bílíktílík sanatyn qatty eskergen. Mekteptegí ūstazdardyń shamamen 70 paıyzy osyndaı joǵary bílíktílík sanatyna ıe.
Jańa oqu jyly oqushylar úshín de erekshe bastaldy. Aısha Tólepbergen №226 mekteptíń 5-synybyna auysyp kelgen. Onyń aıtuynsha, jańa mekteptíń zamanǵa saı jasalǵan keńístígí ony bírden baurap alypty.
«Maǵan jańa mektep óte ūnaıdy. Mūnda qyzyqty nárse kóp: jańa tehnologıyalar, kartınalar. Barlyǵy óte ádemí árí erekshe», – dedí oqushy.
Būl kún, ásírese, bírínshí synyp oqushysynyń ata-anasy úshín mańyzdy boldy. Bírínshí synyp oqushysy Jíbektíń anasy Orynkúl Saımūratova qyzynyń mektep tabaldyryǵyn attaǵanyn úı-íshí quanyshpen qarsy alǵanyn aıtty.