Almaly audanynda tūrǵyn úılerdíń qasbetí bíryńǵaı qalalyq dızaın-kodqa sáıkes jańartylyp jatyr. Nazarbaev dańǵyly, 161 men Shevchenko kóshesí, 51 mekenjaıyndaǵy tūrǵyn úılerde júrgízílgen jūmys osymen ayaqtaldy. Joba ǵımarattardyń syrtqy kelbetín jańartyp qana qoımaı, olardyń paıdalanu merzímín de edáuír ūzartyp otyr. Almaly audanynyń ákímí Arman Shámshın ÓKQ press-tury barysynda būl joba Baku sıyaqty úlken qalalar men sáulettík orta qalyptastyru úshín tabıǵı tasty qoldanatyn Europanyń tarıhı qalalarynyń tájírıbesíne negízdelgenín atap óttí.
Audandaǵy 60 tūrǵyn úıdíń qasbetín jańartu jūmysy páterdíń ıelerímen kelísíp ísteldí. Kádímgí sylaq ūzaq uaqytqa jaramaıtyndyqtan, osy joly jańa materıaldar qoldanyldy. Tyǵyz qalalyq ortada sylaq tez tozyp, qaıta-qaıta jóndep, syrlaudy qajet etedí. Būl úılerdíń qasbetí sońǵy ret 2018 jyly jóndelgenímen, qaıta jańartuǵa tura kelgen. Tabıǵı árí berík tasty paıdalanu – tūraqty urbanıstıkalyq sheshím. Būl bolashaqta basy artyq shyǵyndy azaıtyp, qasbettí jıí jóndeu qajettílígín tómendetedí. Nauryz aıynan bastap audan ákímdígí tūrǵyndarmen jalpy jınalys ótkízíp, jobalyq sheshím men qandaı materıal qoldanylatynyn kelísíp alypty.
«Keleshek-51» MIB tóraıymy Elena Krasnovskayanyń aıtuynsha, tūrǵyndar jańǵyrtu baǵdarlamasyn qoldap, onyń nátıjesíne oń baǵa bergen eken.
«Bízdíń ekí úıímíz osy baǵdarlamaǵa engízíldí. Tūrǵyndar būl jobany kópten kútíp, ūsynǵan ózgerístí bírden qoldady. Barlyq sheshímdí ákímdíkpen bírlesíp ótkízgen jınalysta qabyldady. Qasbetten bólek, bízge jańbyr suyn aǵyzatyn jańa júıe men shatyrǵa mūz qatudy boldyrmaıtyn júıe ornatyldy. Shatyry eńísteu úıler úshín būl óte mańyzdy árí qymbat sheshím. Qoldau kórsetkenderíńízge alǵys bíldíremíz», – deıdí Elena Krasnovskaya.
Sáulettík-kórkemdík sheshímdí ázírleu barysynda úılerdíń salynǵan jyly (1959 jáne 1964 jyldar) eskerílíp, ınjenerlík esepteuge erekshe nazar audaryldy. Írgetas pen kótergísh qūrylymdarǵa artyq salmaq túsírmeu úshín qaptau materıalynyń salmaǵy mūqıyat bólíndí. Bírínshí qabatta tozuǵa tózímdí granıt qoldanylsa, ekínshí qabattan joǵary tek Aqtau ken ornynan alynǵan jeńíl áktas paıdalanylady. Būl jūmys aǵymdaǵy estetıkalyq jóndeu sanatyna jatady jáne qasbettíń sándík árleuín qysqa merzímde jańartuǵa múmkíndík beredí. Al qūrylys satylaryn aldyn ala ornatu qasbetterdíń naqty sáulettík ólshemderín júrgízu úshín qajet boldy.
Jańǵyrtu jūmystarynyń sońǵy kezeńínde zamanauı urbanıstıkalyq talaptarǵa saı sáulettík jaryqtandyru ornatyldy. Jūmsaq aktsenttí jaryq ǵımarattardyń tarıhı sáulettík erekshelíkterín aıqyndap, keshkí uaqytta kósheníń kórkem kelbetín jaqsartady. Sonymen qatar jaryqtandyru júıesí tūrǵyndardyń jaılylyǵyn eskere otyryp jobalanǵan: baǵyttalǵan shamdar jaryqtyń terezege túsuíne jol bermeıdí, tūrǵyndardyń da tynyshtyǵyn būzbaıdy. Būdan bólek, jaryqtandyrylǵan qasbetter kósheníń qauípsízdígín arttyryp, trotuarlardy jaryq árí anyq kórínetín etedí.
«Bíz tarıhı qasbetterdí sapaly dızaın-kodqa jáne álemníń aldyńǵy qatarly qalalarynyń tájírıbesíne súıene otyryp jańartyp jatyrmyz. Negízgí maqsatymyz – qasbettí qaıta-qaıta syrlaı beruden bas tartyp, sertıfıkattalǵan qazaqstandyq tabıǵı árí jeńíl tas materıaldaryn paıdalanu. Qazírgí tańda Nazarbaev pen Shevchenko kóshesíndegí úılerdí qosa alǵanda bes tūrǵyn úıdegí jūmys tolyq ayaqtaldy. Tehnologıyalyq talapty qatań saqtaı otyryp, zamandyq sáulettík jaryqtandyrudy engízu arqyly audanymyzdyń kórkem árí jaıly kelbetín qalyptastyryp jatyrmyz», – dedí audannyń ákímí Arman Shámshın.