Aldaǵy kúnderí qar jauyp, synap baǵanasynyń tómendeuíne baılanysty Almatynyń kommunaldyq qyzmetí kúsheıtílgen jūmys rejımíne auystyryldy. Būl turaly qalanyń kommunaldyq ınfraqūrylymdy damytu basqarmasy men tūrǵyn úı ınspektsıyasynyń ókílderí aıtty.
«Qazgıdromet» RMK málímetínshe, 15 qańtardan 16 qańtarǵa qaraǵan túní Almatyda jauǵan qar 17 qańtar keshke deıín jalǵasady. 16 qańtarda túngí jáne kúndízgí aua temperaturasy –5…–7 gradus shamasynda bolady. Al 17 qańtarda túnde aua temperaturasy –11…–13 gradusqa deıín tómendep, kúndíz –7…–9 gradus shamasynda saqtalady.
Osyǵan baılanysty 15 qańtardan bastap qaladaǵy barlyq kommunaldyq qyzmet kúsheıtílgen rejımde jūmys ísteuge kóshíríldí. Óndírístík bazalarda júrgízushíler, mehanızatorlar men jol salasy jūmysshylarynyń táulík boıǵy kezekshílígí ūıymdastyryldy.
Kóktaıǵaqtyń aldyn alu maqsatynda qar jauǵanǵa deıín arnaıy tehnıka ornalastyrylatyn aumaqtarda 210 qūm sebetín kólík kezekshílíkke qoıylady. Sonymen qatar aldyn ala negízgí magıstraldyq kóshelerge sūıyq reagentter sebílmek.
Táulík boıy 1030 bírlík arnaıy tehnıka, sondaı-aq jeke ūıymdardan tartylatyn 200 tehnıka men 2710 jol salasy jūmysshysy jūmyldyrylady. Aula aumaqtaryn tazalau jūmystaryna 1790 jūmysshy men 256 bírlík arnaıy tehnıka tartylady.
Būǵan qosa, joldyń qauíptí uchaskelerínde, eńís pen jotalarda, sondaı-aq jolaıyryqtaryna kíríp-shyǵatye joldarǵa kóktaıǵaqtyń aldyn alu jáne ony uaqytyly joyu úshín 75 jedel brıgada jol jamylǵysynyń jaǵdaıyn úzdíksíz baqylap otyrady.
Sonymen qatar Almaty qalasynyń Qūtqaru qyzmetí 16 bírlík arnaıy tehnıka men 50 qyzmetkerdí tarta otyryp, táulík boıy kezekshílík ūıymdastyrady. Qalalyq Tótenshe jaǵdaılar departamentí tarapynan 53 bírlík arnaıy tehnıka men 244 adamnan tūratyn jeke qūram kezekshílík atqarady.
Audan ákímdíkterínde atqarylyp jatqan jūmystardyń oryndaluyn baqylau maqsatynda táulík boıǵy kezekshílík engízíledí.
Kúnníń kúrt suytuyna, kóktaıǵaqtyń paıda boluyna, jolda qardyń nyǵyzdalyp qatuyna jáne trotuarlarda mūz qatuyna baılanysty qala tūrǵyndarynan qauípsízdík sharalaryn saqtau sūralady. Júrgízushílerge qozǵalys jyldamdyǵyn azaıtyp, kólík arasyndaǵy araqashyqtyqty ūlǵaıtu jáne shūǵyl manevr jasamau ūsynylady.
Júrgízu tájírıbesí az avtokólík ıeleríne jeke kólíkpen júruden uaqytsha bas tartyp, qoǵamdyq kólíktí paıdalanuǵa keńes beríledí. Al júrgínshílerge trotuarlarda abaı bolu, sondaı-aq kópqabatty úılerdíń mańynda saqtyq tanytu ūsynylady, sebebí shatyrdan qar qūlauy múmkín.