Óńirlik komýnıkasıalar qyzmetinde Naýryzbaı aýdanynyń ákimi Nazıra Toǵyzbaeva bıylǵy on aıdaǵy áleýmettik-ekonomıkalyq damýdyń negizgi kórsetkishin tanystyrdy.
Aýdanda ınvestısıa, bıznes-belsendilik pen búdjettiń kiris bóligi sıaqty negizgi baǵyttarda turaqty ósim baıqalǵan, - dep habarlaıdy Aqshamnews.kz.
Ákimniń málimetinshe, óńdeý ónerkásibiniń betalysy jaqsy: 2025 jyldyń qańtar–qyrkúıek aıynda óndiris kólemi 13,8 mlrd teńgege jetip, ótken jylǵy osy ýaqytpen salystyrǵanda 1,2%-ǵa artypty.
«Investısıadaǵy belsendilik – damýdyń qozǵaýshy kúshi bolyp qala beredi. Aýdanǵa 145,2 mlrd teńge ınvestısıa tartyldy, bul byltyrǵydan 49%-ǵa kóp. Jyl sońyna deıin jalpy ınvestısıa kólemin 197 mlrd teńgege jetkizý josparlanyp otyr, onyń 150 mlrd teńgesi qurylysqa, 47 mlrd teńgesi saýda, óndiris pen basqa da salalarǵa jumsalady», - deıdi Nazıra Toǵyzbaeva.
Aýdanda qazir shamamen 32 myń shaǵyn jáne orta bıznes nysany jumys isteıdi. Olar salyq túsiminiń 33%-ǵa ósýin qamtamasyz etip, jalpy 49,6 mlrd teńge túsim ákelgen (onyń ishinde jergilikti búdjetke – 35,4 mlrd teńge, respýblıkalyq búdjetke – 14,5 mlrd teńge). Kásipkerlikti úzbeı qoldaǵannyń arqasynda shamamen 7000 jańa jumys orny ashyldy.
2024 jyly Naýryzbaı aýdanynyń búdjeti 18 mlrd teńgeni quraǵan. 2025 jyly búdjet kólemi taǵy 40%-ǵa ósip, 29,7 mlrd teńgege jetip otyr.