Almatyda qalanyń 2040 jylǵa deıíngí Bas josparyn túzetuge arnalǵan qoǵamdyq tyńdaular barysynda tūrǵyndar kólík júktemesíne qatysty, atap aıtqanda, ál-Farabı dańǵylyndaǵy tūraqty keptelís pen BRT jelísín damytu tıímdílígí turaly sūraqtar qoıdy. «Almatybasjospar» ǵylymı-zertteu ınstıtutynyń dırektory Ashat Sáduov jańa Bas josparda qandaı sheshímder qarastyrylǵanyn jáne nege qoǵamdyq kólíkke basymdyq bermeı keptelís máselesín sheshu múmkín emestígín túsíndírdí.
Ashat Sáduovtyń aıtuynsha, jańa Bas jospardyń negízgí baǵytynyń bírí keptelís pen ekologıya máselesín sheshudíń negízgí qūraly retínde qoǵamdyq kólíktí damytu bolmaq.
«Eger bíz qalany damytu men ekologıyalyq jaǵdaıdy jaqsartqymyz kelse, qoǵamdyq kólíkke otyruymyz kerek. Qazír kópshílík júrgízushí kózqarasymen qaraıdy, bíraq qalaǵa qoǵamdyq kólíkke basymdyq beretín túbegeılí qadam qajet. Sonda ǵana keptelís máselesín azaıta alamyz», – dedí ol.
Jeltoqsan kóshesíne qatysty qoıylǵan sūraqtarǵa jauap bere otyryp, ınstıtut basshysy būl kóshe jalpy kólík syzbasynyń bír bólígí retínde qarastyrylatynyn aıtty. Jeltoqsan kóshesíndegí aumaq Tımıryazev kóshesí boıyndaǵy BRT jelísíníń jalǵasy retínde qarastyrylyp otyr.
Sondaı-aq ol ál-Farabı dańǵylyndaǵy jaǵdaıǵa jeke toqtaldy. Būl kóshe ūzaq uaqyt boıy «jyldam» árí bos kólík dálízí retínde sanalyp kelgen.
«Kópshílík ál-Farabıde jyldamdyq 80 km/saǵ, baǵdarsham joq dep, sol baǵytqa ūmtylady. Basynda būl júıe jūmys ístedí, bíraq keıín sūranystyń artuy keptelíske alyp keldí, búgínde būl kóshede únemí keptelís bar», – dedí Ashat Sáduov.
Onyń aıtuynsha, mūndaı jaǵdaı basqa megapolısterde de baıqalǵan.
«Máskeu men Máskeu qalasynyń aınalma avtojolynyń tájírıbesí kórsetkendeı, bos kólík dálízí paıda bolǵan sátte barlyǵy sol baǵytqa aǵylady. Ál-Farabı dańǵyly da búgínde osy máselení bastan keshíp otyr. Jalǵyz sheshím – qoǵamdyq kólíktí damytu. Bíz osy ūstanymdy ūstanamyz», – dep sózín túıíndedí ınstıtut dırektory.
Qala basqarushy retínde Ashat Sáduov ál-Farabı dańǵylyndaǵy qozǵalysty ūıymdastyruǵa qatysty tásílderdí ózgertu qajet ekenín aıtty.
«Jeke píkírím – ál-Farabıge baǵdarsham ornatu kerek. Qazír būl kóshení «adamdarǵa yńǵaıly etu» jospary ázírleníp jatyr. Kóptegen eldegídeı, bolashaqta būl jerde jyldam júretín qoǵamdyq kólík dálízderí paıda boluy da múmkín», – dedí Sáduov.
Almatynyń 2040 jylǵa deıíngí Bas josparyn túzetu boıynsha qoǵamdyq tyńdaular jalǵasyp jatyr. Qala tūrǵyndarynyń ūsynysy men eskertuí qūjatty jetíldíru kezínde eskeríledí.