1 qazanǵa deıín jyljymaıtyn múlík ıesí jeke tūlǵalardyń múlík salyǵyn tóleuí qajet. Būl salyqty kímder tóleıdí, onyń mólsherí qalaı esepteledí, zańda qandaı jeńíldík qarastyrylǵan jáne bıyldan bastap qandaı ózgerís kúshíne engení turaly Óńírlík kommunıkatsıyalar qyzmetínde Almaty qalasy boıynsha Memlekettík kíríster departamentíníń Óndírístík emes tólemder basqarmasynyń jeke tūlǵalardy ákímshílendíru men jalpyǵa bírdeı deklaratsıyalau bólímíníń basshysy Áset Esenjígítov aıtyp berdí.
Spıkerdíń aıtuynsha, múlík salyǵyn páterdíń, tūrǵyn úıdíń, sayajaıdyń, garajdyń, avtotūraqtyń, qoıma men basqa da jyljymaıtyn múlík nysanynyń menshík ıesí tóleıdí. Salyq menshík ıesíníń tūrǵylyqty jeríne qaramastan, jyljymaıtyn múlík ornalasqan jer boıynsha esepteledí.
Salyq mólsherí jyljymaıtyn múlík túríne emes, onyń baǵalau qūnyna baılanysty belgílenedí. Baǵalau qūnyn «Azamattarǵa arnalǵan úkímet» memlekettík korporatsıyasy aıqyndaıdy. Esepteu barysynda nysannyń audany, bír sharshy metrdíń bazalyq qūny, fızıkalyq jáne funktsıonaldyq tozu koeffıtsıentterí, aımaqtyq koeffıtsıent, aılyq eseptík kórsetkíshtíń ózgeruí men basqa da kórsetkíshí eskeríledí.
«Bıyldan bastap salyqty esepteu kezínde jańa kórsetkísh – sán-saltanat koeffıtsıentí engízíldí. Ádepkíde ol bírge teń, alaıda keı jaǵdaıda 50 paıyzdan aspaıtyn mólsherde ūlǵaıtyluy múmkín. Sonymen qatar qūny 450 mıllıon teńgeden asatyn jyljymaıtyn múlík nysanyna salyq esepteu tártíbí ózgertíldí», – dedí Áset Esenjígítov.
Spıker salyqty esepteu úshín qoldanylatyn jyljymaıtyn múlíktíń baǵalau qūny naryqtyq baǵadan edáuír tómen ekenín atap óttí. Mysaly, Samal shaǵyn audanyndaǵy audany 150 sharshy metr bolatyn páterdíń baǵalau qūny shamamen 17 mıllıon teńgení qūraıdy, al eseptelgen salyq mólsherí shamamen 34 myń teńge. Aqsaı shaǵynaudanyndaǵy audany 76 sharshy metr bolatyn páterdíń baǵalau qūny shamamen 5,8 mıllıon teńge bolsa, salyq mólsherí 4,5 myń teńge shamasynda.
Múlík salyǵyn 2026 jylǵy 1 qazanǵa deıín tóleu qajet. Eseptelgen salyq somasy ekínshí deńgeıdegí banktíń mobıldí qosymshasynda kórsetíledí, kommunaldyq qyzmettíń tólem túbírtegíne engízíledí. Ony audandyq memlekettík kíríster basqarmasynan ne 1414 nómírí arqyly naqtylauǵa bolady.
Áset Esenjígítov múlík salyǵyna qatysty jeńíldík turaly da eske saldy. Olar azamattardyń jekelegen sanattaryna, atap aıtqanda ardagerlerge, múgedektígí bar adamdarǵa, jetím balalarǵa, múgedektígí bar balany tárbıelep otyrǵan ata-analardyń bíríne, kópbalaly analardyń jekelegen sanaty men salyq kodeksínde kózdelgen basqa da tūlǵalarǵa beríledí. Alaıda būl jeńíldík salyqtan tolyq bosatpaıdy. Olar zańda belgílengen múlík qūnynyń shegínde ǵana qoldanylady. Eger nysannyń baǵalau qūny osy shekten asyp ketse, salyq artyq somaǵa esepteledí.
Memlekettík kíríster departamentíníń málímetínshe, Almatyda jeke tūlǵalardyń menshígíndegí 772 372 jyljymaıtyn múlík nysany tírkelgen. Olardyń jıyntyq baǵalau qūny 3,7 trıllıon teńgeden asady. Al 2025 jylǵa eseptelgen múlík salyǵynyń jalpy somasy 4,8 mıllıard teńgení qūrady.
Ótken jylmen salystyrǵanda jyljymaıtyn múlík nysandarynyń sany shamamen 46 myńǵa nemese 6 paıyzǵa artqan. Olardyń jıyntyq baǵalau qūny 156 mıllıard teńgege, al eseptelgen múlík salyǵynyń jalpy somasy 160 mıllıon teńgege ūlǵaıǵan.