Jasóspírímderdí esírtkí qylmysyna tartu kóbíne tíkeleı esírtkí ūsynudan emes, ınternettegí qosymsha jūmys ízdeuden bastalady, – dep habarlaıdy aqshamnews.kz tílshísí.
Būl turaly Óńírlík kommunıkatsıyalar qyzmetí alańynda «Hak-Nazar» qoǵamdyq qorynyń tóraǵasy, psıholog Ǵalıya Nazhanova aıtyp berdí.
Mamannyń aıtuynsha, qazír esírtkí qylmysyna arbaushylar jekelegen toptaǵy balalardy ǵana emes, óz betínshe aqsha tapqysy keletín jáne derbestíkke ūmtylatyn qarapaıym oqushylardy da maqsatty túrde ízdeıdí.
«Ońaı tabys», «tájírıbesíz jūmysqa alu» nemese «joǵary jalaqy» sıyaqty habarlandyrulardy kórgende jasóspírím oǵan qylmysker bolǵysy kelgendíkten emes, aqsha tapqysy kelgendíkten barady», - dedí Ǵalıya Nazhanova.
Psıholog qylmyskerler jasóspírímderdíń jas erekshelígín jaqsy túsínetínín jáne olardyń bíreuge táueldí boludan qashatynyn, moıyndaluǵa degen qajettílígín, táuekelge qyzyǵushylyǵyn jáne belgílí bír topqa tıesílí boluǵa degen nıetín paıdalanatynyn atap óttí.
Osyǵan baılanysty aldyn alu jūmystary bala mūndaı kúmándí ūsynyspen betpe-bet kelmeı tūryp bastaluǵa tıís.
Mamannyń aıtuynsha, ata-analar balanyń tek mekteptegí ómírímen ǵana emes, tsıfrlyq keńístíktegí belsendílígíne mán berulerí qajet: ınternette nemen aınalysatynyn, kímmen sóılesetínín, qosymsha jūmys ízdep júrgen-júrmegenín jáne aqshany qaıdan alatynyn bíluí mańyzdy.
«Eger úıde jasóspírím kúmándí jūmys turaly ashyq sóılese alatyn eresek adam bolmasa, ol ony sol ūsynysty jasaǵan adammen talqylaıdy», - dedí psıholog.
Sondaı-aq ol ata-analarǵa balanyń kútpegen jerden aqsha tabuy nemese qymbat zattar aluy sıyaqty ózgerísterge nazar audarudy ūsyndy.
«Eger balada síz bermeseńíz de, aqshasy paıda bolsa, ol qymbat zattar satyp alsa nemese típtí otbasyna qarjylaı kómektese bastasa, būl míndettí túrde qylmysqa qatysy bar degendí bíldírmeıdí. Bíraq mūndaı ózgeríster nazar audaryp, ashyq áńgíme júrgízudí qajet etedí», - dedí Ǵalıya Nazhanova.
Brıfıng barysynda jasóspírímderge qauípsíz balamalar jasau máselesíne de erekshe kóńíl bólíndí. Psıhologtyń aıtuynsha, aldyn aludyń tıímdí joldarynyń bírí - jastarǵa zańdy túrde uaqytsha jūmys ísteu jáne ózín damytu múmkíndíkterín ūsynu.
Sondaı-aq, maman jasóspírím esírtkí tūtynuǵa nemese esírtkí qylmysyna tartylǵan jaǵdaıda tek medıtsınalyq kómek jetkílíksíz ekenín atap óttí. Oǵan psıhologıyalyq qoldau, otbasymen jūmys jáne áleumettík daǵdylardy qalpyna keltírudí qamtıtyn keshendí ońaltu qajet.
«Bíz balalarymyzdyń ómíríne neǵūrlym erterek qyzyǵushylyq tanytyp, olarmen sóılesíp, derbestíkke ūmtyluyn qauípsíz joldarmen qoldap, qauíptí belgílerdí uaqytynda baıqaı alsaq, olardy qauíptí sheshímder men auyr saldardan qorǵau múmkíndígí soǵūrlym joǵary bolady», - dep túıíndedí ol.