Almaty qalalyq kardıologıalyq ortalyǵynda alǵash ret júrek transplantasıasy júrgizildi. 34 jastaǵy termınaldyq júrek jetkiliksizdigi bar er adamǵa donor júregi sátti jasaldy, - dep habarlaıdy aqshamnews.kz tilshisi.
Densaýlyq saqtaý mınıstrliginiń málimetinshe, Almaty qalasynyń qalalyq kardıologıalyq ortalyǵynda alǵash ret júrekti transplantattaý júrgizildi. Pasıent – termınaldyq sozylmaly júrek jetkiliksizdigi dıagnozy qoıylǵan 34 jastaǵy er adam resıpıent boldy. Aýrýynyń údeýimen baılanysty oǵan júrekti aýystyryp qondyrý qajet boldy jáne ol respýblıkalyq júrekti transplantattaýdyń kútý paraǵyna engizilgen bolatyn.
Donor – arterıalyq gıpertenzıanyń aýyr túrimen aýyryp, ınsýlt alǵan 50 jastaǵy áıel. Ol Almaty qalasynyń Ortalyq qalalyq klınıkalyq aýrýhanasyna shuǵyl jetkizildi.
Keıin dárigerler konsılıýmy onyń mı ólimin anyqtap, ólimnen keıin donor bolý múmkindigin rastady. Týystary kelisim bergen soń, donorlyq úderis uıymdastyryldy.
Barlyq kezeńderdiń úılestirýi men uıymdastyrylýyn QR DSM Respýblıkalyq transplantattaý jáne joǵary tehnologıalyq medısınalyq qyzmetterdi úılestirý ortalyǵy qamtamasyz etti.
Júrekti transplantattaý boıynsha operasıa bes saǵattan astam ýaqytqa sozylyp, sátti aıaqtaldy. Júrekti transplantattaýdy QKO dırektory Ermaǵambet Qýatbaev pen KF UMC KQ basqarma tóraǵasy, profesor Iý.V. Pányń basqarýymen Almaty qalalyq kardıologıalyq ortalyq pen UMC KQ (Astana) mýltıdısıplınarlyq komandasy oryndady. University Medical Center (UMC) korporatıvtik qorynyń komandasy aqparat alǵan boıda Almatyǵa áriptesterin qoldaý úshin dereý ushyp keldi.
Osy aıda Almaty qalasynyń qalalyq kardıologıalyq ortalyǵy júrekti transplantattaýdy júrgizýge ýákiletti medısınalyq uıymdardyń tizbesine resmı túrde engizilgenin eskere keteıik.
Iýrıı Vladımırovıch Pá bul mańyzdy oqıǵamen ortalyqtyń ujymyn quttyqtap, onyń Almatydaǵy kardıohırýrgıanyń damýy úshin mańyzdylyǵyn atap ótti. Sondaı-aq ol donordyń týǵan-týystaryna shynaıy kóńil aıtyp, qabyldaǵan sheshimderi úshin alǵys bildirdi. Bul sheshim basqa adamdardyń ómirin saqtap qalýǵa múmkindik berdi.
"Transplantologıa baǵdarlamasyna qatysý bizge pasıentterimizdiń ómir sapasy men uzaqtyǵyn jaqsartýǵa qajetti operasıalardy júrgizýge múmkindik beredi. Bul baǵyt – medısınanyń damýynyń da, qoǵamnyń aǵzany transplantattaýǵa muqtaj jandarǵa kómektesýge daıyndyǵynyń da kórsetkishi", – dedi Ermaǵambet Qýatbaev.
Bul – bıyl Almaty qalasynyń Ortalyq qalalyq klınıkalyq aýrýhanasynyń bazasynda tirkelgen tórtinshi mýltıaǵzalyq donor.