7 mausym kúní Abaı alańynda Almaty qalasy ákímdígíníń qoldauymen halyqaralyq The Spirit of Tengri zamanauı etnıkalyq muzyka festıvalí óttí, – dep habarlaıdy aqshamnews.kz tílshísí.
Ortalyq Azıyadaǵy eń írí mádenı ís-sharalardyń bírí taǵy da muzykanttar, qolónershíler, suretshíler men ondaǵan myń kórermendí bír arnaǵa toǵystyryp, mádenı dıalog pen shyǵarmashylyq tájírıbe almasudyń mańyzdy alańyna aınaldy.
Ūıymdastyrushylardyń málímetínshe, festıval ótken kúní ís-sharaǵa shamamen 50 myń adam kelgen. Qonaqtar úshín kontserttík alań, Ethno Market qolónershíler jármeńkesí, demalys aımaqtary, fudkort, ınteraktıvtí jáne art-keńístíkter jūmys ístedí.
Bıyl otandyq ónerpazdardy qoldauǵa erekshe kóńíl bólíndí. Open Call ashyq íríkteuíníń jeńímpazdary — JU BAND, DUANA jáne NY-ZA toptary alǵash ret festıvaldíń bas sahnasynda óner kórsettí. Jas muzykanttar dástúrlí qazaq áuenderín djaz, rok jáne world music baǵyttarymen úılestíre otyryp, zamanauı etnıkalyq muzykanyń ózíndík tyń úlgísín ūsyndy.
Festıvaldíń arnaıy qonaǵy — ańyzǵa aınalǵan Enigma jobasynyń vokalısí Andru Donalds boldy. Onyń óner kórsetuí keshtíń basty oqıǵalarynyń bíríne aınalyp, Abaı alańyna jınalǵan túrlí jastaǵy kórermenníń basyn qosty. Ánshímen bírge sahnaǵa Qyrǵyz Respublıkasynyń «Manas» prezıdenttík kameralyq orkestrí, qazaqstandyq ánshí Nora Nūǵman jáne Jánıya Áubákírovanyń avtorlyq mektebíníń balalar hory shyqty.
Festıvaldíń ajyramas bólígíne aınalǵan Ethno Market alańynda 40-tan astam qolónershí men sheber sándík-qoldanbaly óner būıymdaryn, zamanauı dızaın úlgílerín, toqyma jáne keramıka ónímderín, ūlttyq kádesyılardy kópshílík nazaryna ūsyndy. Festıval shaǵyn jáne orta bıznestíń damuyna da serpín beríp, kásípkerlerge, qyzmet kórsetu salasynyń ókílderíne jáne kreatıvtí ındustrıya mamandaryna qosymsha múmkíndíkter ūsyndy.
Al suretshí LAILA ZHARKYN ūsynǵan «Máńgílík proektsıyasy» atty art-performans baǵdarlamanyń erekshe mádenı jańalyǵy boldy. Qazaqstannyń kóne petroglıfterínen shabyt alǵan jobaǵa festıval qonaqtary da qatysyp, mádenı mūra men ūrpaqtar sabaqtastyǵyna arnalǵan ortaq kórkem tuyndyny jasauǵa atsalysty.
The Spirit of Tengri festıvalí Almatyda 2013 jyldan berí ótkízílíp keledí. Osy uaqyt íshínde ol Qazaqstannyń eń tanymal mádenı brendteríníń bíríne aınaldy. Joba oqıǵalyq turızmdí damytuǵa, jas ónerpazdardy qoldauǵa, ūlttyq mádenıettí dárípteuge jáne Almatynyń Ortalyq Azıyadaǵy zamanauı mádenı ortalyq retíndegí mártebesín nyǵaıtuǵa úles qosyp keledí.
2026 jyly festıval halyqaralyq deńgeıde moıyndalyp, bema! Best Experience Marketing Awards syılyǵynyń «Halyqaralyq festıval» nomınatsıyasynda bírínshí oryn aldy.