Almatyda 25 qarasha men 10 jeltoqsan aralyǵynda áıelderge qatysty zorlyq-zombylyqty joıýdyń halyqaralyq kúnine oraı "Genderlik zorlyq-zombylyqqa qarsy 16 kún belsendi is-qımyl" respýblıkalyq aksıasy ótip jatyr, - dep habarlaıdy Aqshamnews.kz.
Aksıanyń maqsaty – otbasy-turmystyq jáne genderlik zorlyq-zombylyqtyń aldyn alý, ony boldyrmaý sharalary týraly halyqtyń habardarlyǵyn arttyrý, otbasy ınstıtýtyn nyǵaıtý, analyq pen balalyqty qorǵaý. Kampanıa aıasynda qalada aqparattyq-túsindirý, profılaktıkalyq jáne áleýmettik baǵyttaǵy keshendi is-sharalar uıymdastyrylyp, qoǵamda zorlyq-zombylyqtyń kez kelgen túrine nóldik tózim qaǵıdatyn qalyptastyrý jáne jábirlenýshilerge qoldaý kórsetý baǵytyndaǵy jumystar kúsheıtildi.
– Memleket basshysy aıqyndaǵan "Zań men tártip" qaǵıdaty – bizdiń kúndelikti qyzmetimizdiń negizgi tiregi. 2025 jyl Profılaktıka jyly dep jarıalandy, sondyqtan biz úshin zorlyq-zombylyq faktilerine tek áreket etý ǵana emes, olardyń aldyn alý – basty mindet. Qaýipsiz orta qalyptastyrý eń aldymen bir-birimizge degen syılastyqtan, otbasy men qoǵamdaǵy jaýapkershilikten bastalady. Polısıa aldaǵy ýaqytta da profılaktıkalyq sharalardy kúsheıtip, halyqpen, áleýmettik qyzmettermen jáne úkimettik emes uıymdarmen birlese jumys isteıdi. Árbir áıel men árbir bala ózderin qaýipsiz sezinýi kerek, – dep atap ótti Almaty qalasy PD Qoǵamdyq qaýipsizdik basqarmasynyń bastyǵy Asqat Qulbaev.
Almatylyqtar táýlik boıy kelesi baılanys jelilerine júginip, kómek pen keńes ala alady: "111" – balalar men otbasylardy qoldaý qyzmeti, "150" – ulttyq senim telefony "102" – polısıanyń jedel qyzmeti