Almatyda qala ákímí Darhan Satybaldynyń tapsyrmasyna sáıkes zańsyz qūrylysqa tosqauyl qoyu jáne qala qūrylysy talaptarynyń saqtaluyn baqylaudy kúsheıtu jūmystary jalǵasuda. 2026 jyldyń basynan berí zań talaptaryn būza otyryp salynǵan 41 nysan tolyq nemese íshínara súríldí. Būl turaly Almaty qalasynyń Qala qūrylysyn baqylau basqarmasynyń ókílderí habarlady.
Qazírgí uaqytta Almatynyń Ádílet departamentínde zańdy kúshíne engen 74 sot sheshímí oryndalu satysynda tūr. Olar zańsyz salynǵan nysandardy tolyq nemese jartylaı súríp tastaudy kózdeıdí.
Jyl basynan berí basqarma 1072 jospardan tys tekseru júrgízdí. Onyń qorytyndysy boıynsha jalpy somasy 383,9 mln teńgege aıyppūl salynyp, anyqtalǵan zańbūzushylyqtardy joyu turaly 432 nūsqama beríldí.
Qūrylys-montaj jūmystaryn sapasyz oryndaǵany úshín 43 ūıym jauapkershílíkke tartyldy. Sondaı-aq, tehnıkalyq qadaǵalaudy tıístí deńgeıde júrgízbegení úshín 40 ūıym men tehnıkalyq qadaǵalau mamanyna qatysty shara qoldanyldy. Būdan bólek, 148 jobalau ūıymy ákímshílík jauapkershílíkke tartylyp, olarǵa jalpy somasy 32,4 mln teńge kólemínde aıyppūl salyndy.