8,38 gektar aumaq jańartyldy, dep habarlaıdy aqshamnews.kz tílshísí.
Almatynyń Áuezov audanynda Ótegen batyr kóshesínen Saın kóshesíne deıíngí aralyqtaǵy Jūbanov kóshesín keshendí kórkeıtu jáne kógaldandyru jūmystary ayaqtaldy. Jańartylǵan aumaqtyń jalpy kólemí – 8,38 gektar. Joba shamamen 5 200 tūrǵyndy qamtıdy.
Joba ayasynda júrgínshíler ınfraqūrylymy jańartyldy. Atap aıtqanda, 11 495 sharshy metr trotuar jabyny tóselíp, 4 329,6 sharshy metr aumaqqa asfalt, 1 968 sharshy metr jerge rezeńke tósemí salyndy. Būl júrgínshílerge, sonyń íshínde balalar men egde jastaǵy tūrǵyndarǵa qolaıly jaǵdaı jasauǵa múmkíndík beredí.
Kógaldandyru jūmystaryna da erekshe kóńíl bólíndí. Joba ayasynda 31 812 sharshy metr aumaq kógaldandyryldy. Mūnda 464 aǵash pen 21 757 sándík būta egílíp, 6 095 sharshy metr gúlzar jáne 25 717 sharshy metr kógal jasaldy. Jasyl jelekterdí kútíp-baptau úshín 31 812 sharshy metr aumaqty qamtıtyn suaru júıesí de qarastyrylǵan.
Jańartylǵan aumaqta ár jastaǵy tūrǵyndardyń demalyp, belsendí uaqyt ótkízuíne arnalǵan ınfraqūrylym jasaldy. Atap aıtqanda, 35 demalys aımaǵy, 11 balalar oıyn keshení, 16 sporttyq qūral-jabdyq jáne 9 átkenshek ornatyldy. Sonymen qatar oryndyqtar men qoqys jáshíkterí qoıyldy.
Jańartylǵan kósheníń erekshelígí – zamanauı óner men qazaqtyń ūlttyq dástúrlerín ūshtastyrǵan úsh avtorlyq músíndík kompozıtsıya. Olardy músínshíler A. Ormanbekov, Q. Asylbaı, T. Ermūhametov jáne S. Nurushevten qūralǵan shyǵarmashylyq top ázírlegen.
«Úlkenge qūrmet» kompozıtsıyasy ūrpaqtar sabaqtastyǵyn, ízettílík pen úlkenge degen syılastyqty beıneleıdí. Úsh díńgek adamnyń áke, ana jáne erlí-zaıyptylar jaǵynan taraıtyn úsh tuystyq arnasynyń bírlígín bíldíredí. Kókke sozylǵan būtaqtary bata sūraǵan alaqandy elestetse, altyn tústes jemísterí ata-baba danalyǵyn meńzeıdí.
«Áuen» músíní kórnektí qazaq kompozıtory Ahmet Jūbanovtyń mūrasyna arnalǵan. Kompozıtsıyada dombyra men shańqobyzdyń sūlbalary kórkem úılesím tapqan. Olar halyqtyń ruhanı tamyry men muzykalyq dástúrlerín beıneleıdí. Músín «Qazmoıyn» jáne «Qoshqarmúıíz» ūlttyq oyu-órnekterímen tolyqtyrylǵan. Būl órnekter sūlulyqty, erkíndíktí, bereke men dástúr sabaqtastyǵyn bíldíredí.
Al «Keń dala» atty úshínshí kompozıtsıyada úsh jylqynyń beınesí somdalǵan. Olardyń sūlbasy qazaq dalasynyń keńdígín, ruh kúshín, tabıǵat úılesímín jáne erkíndíkke ūmtylysty tanytady. Músín ūlttyq qūndylyq pen tuǵan jerge degen súıíspenshílíktí dárípteıdí.
Kórkeıtu barysynda keshkí jaryqtandyruǵa da erekshe mán beríldí. Ornatylǵan shamdar júrgínshíler jolyn jaqsy jaryqtandyryp, qarańǵy uaqytta seruendeuge qolaıly jaǵdaı jasaıdy.
Keshendí kórkeıtu nátıjesínde Jūbanov kóshesí jańa kelbetke ıe boldy. Jańartylǵan aumaqta auqymdy kógaldandyru, zamanauı ınfraqūrylym men ūlttyq óner ózara úılesím tapqan.
Joba Áuezov audanynda qolaıly qalalyq orta qalyptastyruǵa, jasyl jelek kólemín arttyruǵa jáne tūrǵyndarǵa arnalǵan sapaly qoǵamdyq keńístíkter qūruǵa baǵyttalǵan.