2026 jyldyń alǵashqy jartyjyldyǵynda Almatyda skrınıngtík tekseruler nátıjesínde sút bezí obyrynyń 200-den astam, al toq íshek pen tík íshek obyrynyń 58 jaǵdaıy anyqtaldy. Barlyq nauqas dıspanserlík baqylauǵa alyndy.
Būl málímetter Almaty qalasy Qoǵamdyq densaulyq saqtau basqarmasynyń basshysy Marat Pashımovtyń tóraǵalyǵymen ótken jūmys keńesínde aıtyldy. Jıynǵa qalanyń medıtsınalyq ūıymdarynyń basshylary qatysty.
Keńes barysynda negízgí tıímdílík kórsetkíshteríníń oryndaluy, ımmundyq profılaktıka jūmystarynyń barysy, skrınıngtík baǵdarlamalardyń nátıjelerí, sondaı-aq medıtsınalyq-sanıtarlyq alǵashqy kómek ūıymdaryndaǵy ınfektsıyalyq aurular kabınetterí men Balalar úıíníń qyzmetí talqylandy.
Alǵashqy jartyjyldyqtyń qorytyndysy boıynsha halyqty skrınıngtík tekserumen qamtuǵa qatysty josparly kórsetkíshterdíń basym bólígí tolyq oryndalǵan nemese asyra oryndalǵan.
375 myńnan astam bala profılaktıkalyq tekseruden óttí. Qant dıabetíne arnalǵan skrınıngpen 131 myńnan astam adam, qan aınalymy júıesí aurularyna – 110 myńnan astam adam, glaukomaǵa – 145 myńnan astam adam, vırustyq gepatıtke – 34 myńnan astam adam, tserebrovaskulyarlyq aurularǵa – 24 myńnan astam adam qamtyldy.
Toq jáne tík íshek obyryn erte anyqtauǵa arnalǵan skrınıngten 108 myńnan astam tūrǵyn óttí. Sonyń nátıjesínde 803 túrlí patologıya anyqtalyp, onyń 745-í qatersíz ísíkter bolsa, 58-í toq jáne tík íshektíń qaterlí ísígí ekení belgílí boldy.
Keńes qorytyndysynda Marat Pashımov tūrǵyndardy profılaktıkalyq tekseruler men skrınıngtík baǵdarlamalarǵa keńínen tartu jūmystaryn kúsheıtudí tapsyrdy. Óıtkení aurudy erte kezeńde anyqtau emdí der kezínde bastap, onyń tıímdílígín edáuír arttyruǵa múmkíndík beredí.
Sonymen qatar medıtsınalyq ūıymdarǵa skrınıng qorytyndysy oń shyqqan azamattardyń qosymsha tekserudíń ekínshí kezeńínen «jasyl dálíz» qaǵıdaty boıynsha 3-5 jūmys kúní íshínde ótuín qamtamasyz etu míndetí júkteldí.
Būǵan qosa, auru anyqtalmaǵan medıtsınalyq ūıymdardyń jūmysyna apta saıyn monıtorıng júrgízílíp, medıtsınalyq-sanıtarlyq alǵashqy kómek kórsetetín ūıymdardyń qyzmetí aı saıyn saralanyp otyrady.
Sondaı-aq, skrınıngtík zertteulerdíń sapasyn arttyruǵa erekshe kóńíl bólínedí. Osy maqsatta jekemenshík medıtsınalyq ūıymdarda syrtqy audıt júrgízílíp, eńbekpen qamtylǵan tūrǵyndardyń skrınıngten qolaıly uaqytta ótuí úshín keshkí mezgílde jáne senbí kúnderí arnaıy qabyldau saǵattaryn ūıymdastyru josparlanyp otyr.