Qazírgí uaqytta Almatyda 31 smart taqta ornatylǵan, dep habarlaıdy aqshamnews.kz tílshísí.
Almatyda qalany tanyp-bíluge, kóríktí jerlerdí tabuǵa, mádenı ís-sharalar turaly aqparat aluǵa jáne qajettí málímetterdí bíluge kómektesetín Jerry atty jańa tsıfrlyq servıs íske qosyldy. Būl kóshelerde ornatylǵan ınteraktıvtí smart taqtalar. Qalalyq turızm basqarmasynyń málímetínshe, jobany qazaqstandyq CITIX kompanıyasy Visit Almaty ūıymymen bírlesíp júzege asyrdy.
Qazírgí uaqytta Almatyda 31 smart taqta ornatylǵan. Olar Terrenkurda, Respublıka saraıynyń mańynda, 28 gvardıyashy-panfılovshylar sayabaǵynda, Panfılov jáne Tóle bı kóshelerínde, Esentaı men Kíshí Almaty ózenderíníń jaǵalaularynda, metro beketteríníń, Ortalyq ámbebap dúkení men Ortalyq memlekettík muzeıdíń janynda ornalasqan. Jaqyn arada taǵy tórt qūrylǵy ornatu josparlanyp otyr.
Smart taqtalar arqyly jaqyn mańdaǵy dámhana, dáríhana, muzeı, dúkender men qoǵamdyq kólík ayaldamalaryn tabuǵa bolady. Júıe qūrylǵynyń ornalasqan jerín eskeríp, qajettí baǵytty, oǵan deıíngí qashyqtyq pen jolǵa ketetín uaqytty kórsetedí.
Turısterge arnalǵan daıyn seruen baǵyttary, kóríktí oryndar toptamasy jáne qaladaǵy kontsertter, spektaklder, kórmeler men festıvalder turaly aqparat ūsynylǵan. Servıs qazaq, orys jáne aǵylshyn tílderínde qoljetímdí. Ony paıdalanu tegín árí tírkeludí qajet etpeıdí.
Smart taqtalarda Almaty tarıhyna arnalǵan jeke bólím de bar. Qalam Media-men bírlesíp ázírlengen joba ayasynda qalanyń arhıvtík fotosuretterí sol oryndardyń qazírgí kórínísímen salystyrylǵan. Osy arqyly kelushíler tanys kósheler men ǵımarattardyń ondaǵan jyl íshínde qalaı ózgergenín kóre alady.
Sondaı-aq smart taqtalardan 102, 103 jáne 112 shūǵyl qyzmetteríníń baılanys nómírlerí, qūjat joǵalǵan jaǵdaıda ne ísteu kerektígí jáne medıtsınalyq kómek alu tártíbí turaly aqparat tabuǵa bolady. Ekrandarda aua raıy men aua sapasy turaly málímetter de kórsetíledí. QR-kod arqyly baǵyttar men ózge de aqparatty smartfonǵa jíberu múmkíndígí qarastyrylǵan.
Almaty qalasy Turızm basqarmasynyń basshysy Ǵalıya Toqseıtovanyń aıtuynsha, turıster sanynyń artuyna baılanysty tsıfrlyq servısterdí damytu ózektí bola túsken.
«Bíz úshín joǵary kórsetkíshterdí saqtap qana qoımaı, shahar qonaqtaryna būdan da qolaıly jaǵdaı jasau mańyzdy. Turıster sanynyń artuyna baılanysty zamanauı turıstík ınfraqūrylym men qoljetímdí tsıfrlyq servısterdí damytu aıryqsha mánge ıe. Jerry jobasy turısterge kóríktí jerlermen óz betínshe tanysuǵa, seruen baǵyttaryn josparlauǵa jáne Almatyny aralau kezínde qajettí aqparatty sol jerde aluǵa múmkíndík beretín qosymsha qūralǵa aınalady», – dedí Ǵalıya Toqseıtova.
2025 jyldyń qorytyndysy boıynsha Almatyǵa 2,5 mıllıonǵa juyq turıst kelgen. Onyń íshínde 754 myńy – sheteldík qonaqtar. 2026 jyldyń alǵashqy jartyjyldyǵynda Ūlttyq statıstıka byurosynyń málímetínshe, qala qonaq úılerí 1,14 mıllıon adamǵa qyzmet kórsetken. Al osy salanyń kírísí 53,1 mıllıard teńgege jetken.