Búgín tańǵy saǵat 07:00-de Almaty qalasynda 653 saılau uchaskesí ashylyp, jalpyūlttyq referendumǵa dauys beru bastaldy. Alǵashqy mınuttan-aq qalanyń barlyq audanyndaǵy uchaskelerde tūrǵyndardyń belsendí qatysuy baıqaldy. Kóptegen almatylyq demalys kúní tańerteń erte kelíp, dauys berudí jón kórgen, – dep habarlaıdy aqshamnews.kz tílshísí.
Saılau uchaskelerínde merekelík kóńíl kúı qalyptasty. Qala tūrǵyndary úshín estelík suretke túsuge arnalǵan taqyryptyq fotoaımaqtar ūıymdastyrylyp, dástúr boıynsha alǵash dauys bergen azamattarǵa shaǵyn syılyqtar ūsynyldy.
Almatyda barlyq azamattyń dauys beruíne qatysuyna qolaıly jaǵdaı jasauǵa erekshe kóńíl bólíngen. Kóru qabíletí būzylǵan azamattar úshín byulletenderge arnalǵan Braıl qarpímen jazylǵan arnaıy trafaretter daıyndaldy, al dauys beru kabınalary erekshe qajettílígí bar adamdarǵa beıímdelgen. Sonymen qatar uchaskelerde tsıfrlyq qoldau ūıymdastyrylyp, onlaın surdoaudarmashylar estu qabíletí būzylǵan azamattarǵa qajettí aqparat aluǵa kómektesedí.
Múmkíndígí shekteulí azamattardyń uchaskelerge baruyn jeńíldetu úshín «Invataksı» qyzmetí de íske qosyldy. Būl qyzmet tūrǵyndardyń saılau uchaskeleríne kedergísíz jetuíne múmkíndík beredí. Al jasy úlken nemese densaulyǵyna baılanysty uchaskege kele almaıtyn azamattar úshín úıde dauys beru ūıymdastyrylǵan. Saılau komıssıyasynyń múshelerí kóshpelí jáshíktermen tūrǵyndardyń mekenjaıyna baryp, árbír azamattyń referendumǵa qatysuyna múmkíndík jasap otyr.