Kórmede túrkí álemíníń tarıhı mūrasy men baı mádenıetín beıneleıtín 54 akvarel tuyndysy kópshílík nazaryna ūsynylady, dep habarlaıdy aqshamnews.kz tílshísí.
2026 jyly 10 qarashada saǵat 16:00-de «Almaty qalasy muzeıler bírlestígí» KMQK-ǵa qarasty Almaty galereyasynda túrík suretshísí, akvarel keskíndemesíníń sheberí Ahmet Ógretenníń «Su joly: Bosfordan Ūly dalaǵa deıín» atty halyqaralyq kórmesí saltanatty túrde ashylady. Kórme Almaty qalasy ákímdígí men Túrkıya Respublıkasynyń Almaty qalasyndaǵy Bas konsuldyǵynyń qoldauymen ūıymdastyrylyp otyr.
Kórmede túrkí álemíníń tarıhı mūrasy men baı mádenıetín beıneleıtín 54 akvarel tuyndysy kópshílík nazaryna ūsynylady. Suretshí eńbekterínde Bosfor jaǵalauynan Ūly dalaǵa deıíngí keńístíktí qamtı otyryp, túrkí halyqtarynyń ortaq tarıhyn, mádenı mūrasyn jáne ǵasyrlar boıy qalyptasqan ruhanı baılanysyn kórsetedí. Akvarel tehnıkasy arqyly jaryq pen tústíń názík úılesímín sheber jetkízedí. Sonymen qatar, dástúrlí shyǵys óneríníń bír túrí ebru tehnıkasyn da meńgergen suretshí onyń elementterín shyǵarmashylyǵynda keńínen qoldanady.
Kórme Almatynyń mádenı ómíríndegí mańyzdy oqıǵalardyń bírí bolmaq. Sondaı-aq Qazaqstan men Túrkıya arasyndaǵy mádenı baılanysty nyǵaıtuǵa, kásíbı yntymaqtastyqty damytuǵa jáne halyqaralyq mádenı dıalogty keńeıtuge yqpal etedí.
Kórmeníń saltanatty ashyluyna Túrkıya Respublıkasynyń Almaty qalasyndaǵy Bas konsuly, dıplomatıyalyq korpus ókílderí, Almaty qalasy Mádenıet basqarmasynyń ókílderí, Qazaqstan Suretshíler odaǵynyń múshelerí, shyǵarmashylyq zıyaly qauym ókílderí, jas suretshíler, mádenıet jáne óner qaıratkerlerí, būqaralyq aqparat qūraldarynyń ókílderí, sondaı-aq qala tūrǵyndary men qonaqtary qatysady.
Kórme Almaty galereyasynda 2026 jyly 22 qarashaǵa deıín jalǵasady.
Ótetín orny: Almaty galereyasy, Dostyq, 44