23 tamyzda Almaty elímízdegí sayası oqıǵaǵa belsene qatysty. Tańǵy saǵat altyda alǵashqy mamandandyrylǵan uchaskeler esígín ashsa, jetíden bastap megapolıstegí júzdegen saılau uchaskesíne tūrǵyndar aǵyla bastady. Ūzyn-sonar kezek, alǵash ret dauys bergen jastar, ǵasyr jasaǵan qarıyalar, sport jáne óner jūldyzdary, ūlttyq oıyndar men jármeńkeler – Almatyda Qūryltaı deputattaryn saılau osyndaı kórínístermen este qaldy. Aqshamnews.kz saılau kúníníń jarqyn sátterín toptady.
Almatyda saılau tańy erte bastaldy
Almatyda saılau kúní ádettegíden erte bastaldy. Saǵat 06:00-de azamattar uaqytsha bolatyn oryndarda ornalasqan 11 mamandandyrylǵan saılau uchaskesí jūmysqa kírístí. Olardyń qatarynda áskerı bólímderde, shıpajaılarda jáne ózge de mekemelerde ūıymdastyrylǵan uchaskeler boldy. Al saǵat 07:00-de qala boıynsha dauys beru bastaldy.
Megapolıste 670 saılau uchaskesí jūmys ístedí. Onyń 597-sí azamattardyń tírkelgen jerí boıynsha, taǵy 73-í azamattar uaqytsha bolatyn oryndarda qūryldy. Almatynyń saılaushylar tízímíne 1 329 251 adam engízíldí. Saılau protsesín ūıymdastyruǵa uchaskelík jáne aumaqtyq komıssıyalardyń jalpy 4 721 múshesí jūmyldyryldy.
Tańǵy jetíden-aq kezek paıda boldy
Uchaskeler ashylǵannan keıín kóp ūzamaı Almatynyń bírqatar audanynda dauys beruge kelgen tūrǵyndardyń kezegí qalyptasty. Mektepter, kolledjder men ózge de nysandarda ornalasqan uchaskelerdíń kíreberísínde adamdar tańǵy uaqyttan jınaldy.
Saılaushylar arasynda uchaskege otbasymen, dostarymen jáne áríptesterímen bírge kelgender de kóp boldy. Keı tūrǵyndar demalys kúníníń qalǵan bólígín jaqyndaryna arnau úshín tańdauyn tańerteń erte jasaǵan. Adam sanynyń kóptígíne qaramastan, dauys beru qalypty árí ūıymdasqan jaǵdaıda júrgení habarlandy.
Būl kóríníster megapolıstegí saılau kúníníń negízgí belgíleríníń bíríne aınaldy. Tańǵy uaqyttan bastalǵan belsendílík túske deıín jalǵasyp, uchaskelerge ár buyn ókílderí keldí.
Qala ákímí de óz tańdauyn jasady
Almaty ákímí Darhan Satybaldy da Qūryltaı deputattaryn saılauǵa qatysyp, óz tańdauyn jasady. Qala basshysy saılau uchaskesíne kelíp, dauys beru rásímínen óttí.
Saılau – barlyq buynǵa ortaq
Almatydaǵy saılau uchaskelerínde jastar men egde jastaǵy tūrǵyndardy, kópbalaly otbasylardy, eńbek ūjymdarynyń ókílderín qatar kezdestíruge boldy.
Bírí ómírínde alǵash ret byulleten alyp jatsa, endí bírí būǵan deıíngí talaı sayası nauqanǵa qatysqan tájírıbelí saılaushy retínde óz tańdauyn jasady.
Saılau kúní tek jekelegen azamattar ǵana emes, tūtas áuletterdíń azamattyq belsendílígímen de erekshelendí. Máselen, «Mereılí otbasy – 2025» ūlttyq baıqauynyń jeńímpazy atanǵan almatylyq Dúısebaevtar áuletí №200 mektep-gımnazıyada ornalasqan №562 saılau uchaskesínde dauys berdí. Tórt buyn ūstazdarynyń basyn qosqan áulettíń jalpy pedagogıkalyq eńbek ótílí 501 jylǵa jetedí. Ūlbosyn Dúısebaeva toǵyz bala tárbıelep ósírgen, al onyń toǵyz balasy da pedagog mamandyǵyn tańdaǵan. Ūstazdyq joldy úsh nemeresí de jalǵastyryp keledí.
Sport sańlaqtary da tańdau jasady
Almatydaǵy Qūryltaı saılauyna qazaqstandyq sporttyń tanymal ókílderí de belsendí qatysty.
Olardyń qatarynda mánerlep syrǵanaudan 2026 jylǵy qysqy Olımpıada oıyndarynyń chempıony Mıhaıl Shaıdorov, Olımpıada júldegerlerí Nazym Qyzaıbaı, Ǵūsman Qyrǵyzbaev, Narıman Qūrbanov, Islam Sátpaev jáne Aleksandra Le boldy.
Mıhaıl Shaıdorov Almatydaǵy №382 saılau uchaskesínde dauys berdí. Al sporttyq gımnastıkadan Parıj Olımpıadasynyń kúmís júldegerí Narıman Qūrbanov №229 uchaskege keldí. Būl jerdíń sportshy úshín ózíndík mání de bar: saılau uchaskesí ol bala kezínde barǵan №80 balabaqshada ornalasqan.
Bokstan úsh dúrkín álem chempıony, Olımpıada oıyndarynyń qola júldegerí Nazym Qyzaıbaı saılau kúní oqu-jattyǵu jıynynda júrgen. Soǵan qaramastan, sportshy aldyn ala esepten shyǵaru kuálígín alyp, Almaty oblysyndaǵy Jańashar auylynda ornalasqan saılau uchaskesínde óz tańdauyn jasady.
Dauys bergender qatarynda sporttyq gımnastıka sheberí Mılad Karımı, erkín kúresten Azıyanyń úsh dúrkín chempıony Nūrqoja Qaıpanov, taekvondodan álem chempıonatynyń qola júldegerí Aıdana Qūmartaeva, WKF karateden álem chempıonatynyń ekí dúrkín qola júldegerí Dıdar Ámírálí de boldy. Qysqy sport túrlerínen Danıl Vasılev, Ilya Mızernyh jáne Rostıslav Hohlov ta saılauǵa qatysty.
1300 shaqyrym júgíríp kelíp, dauys berdí
Saılau kúníndegí eń erekshe oqıǵalardyń bírí ultramarafonshy Meńdíbaı Álímǵazınovtyń Almatyǵa keluí boldy.
58 jastaǵy sportshy 10 tamyzda Astanadan jolǵa shyǵyp, 23 tamyzda Almatyǵa jettí. Ol osy aralyqta shamamen 1300 shaqyrymdy júgíríp ótíp, qalaǵa kelgen soń №545 saılau uchaskesíne baryp, dauys berdí.
Sportshy úshín ūzaq sapardyń máresí Almatyǵa jetumen ǵana ayaqtalǵan joq. Ol el ómíríndegí mańyzdy kúní azamattyq tańdauyn jasaudy da maqsatynyń bír bólígí retínde atady.
Óner ıelerí saılaudan shet qalǵan joq
Saılau kúní Almatynyń mádenıet jáne óner qauymdastyǵynyń ókílderí de uchaskelerge kelíp, óz tańdauyn jasady.
Qazaqstannyń halyq artısí, akter árí rejısser Tūńǵyshbaı Jamanqūlov Qūryltaı deputattaryn saılauǵa qatysyp, dauys berdí. Óner maıtalmany saılauǵa qatysudy azamattyq jauapkershílíkpen baılanystyryp, Qūryltaıda eldíń bolashaǵyn oılaıtyn, halyqtyń mūń-mūqtajyn jetkízetín azamattar bolady degen senímín bíldírdí.
Qazaqstannyń eńbek síńírgen artısí, teatr jáne kıno aktrısasy Gúljamal Qazaqbaeva da Almatydaǵy №64 saılau uchaskesínde tańdau jasady. Aktrısa azamattardyń qoǵamdyq-sayası ómírge belsendí qatysuynyń mańyzyn atap óttí.
Al Alatau audanyndaǵy №487 saılau uchaskesíne belgílí estrada ánshísí Abaı Begeı keldí. Óner ıesí ár azamattyń dauysy eldíń erteńíne qosylǵan úles ekenín atap óttí.
Saılau kúní qazaq óneríníń abyzy, Qazaqstannyń halyq ártísí Bıbígúl Tólegenova da tańdau jasady. 96 jastaǵy opera ánshísíníń densaulyq jaǵdaıy men jas erekshelígí eskerílíp, Almatydaǵy úıínde dauys beruíne jaǵdaı jasaldy. Óner ıesí būl Qūryltaıǵa ótíp jatqan alǵashqy saılau ekenín atap óttí.
Osylaısha, sahna men sport arenasynda el namysyn qorǵap, qoǵamǵa tanylǵan tūlǵalardyń saılauǵa qatysuy kúnníń este qalarlyq kadrlarynyń bíríne aınaldy.
Jūmys ústínde júrgender de dauys berdí
23 tamyzda jūmys babymen óz uchaskesínen alysta júrgen azamattarǵa da tańdau jasauǵa múmkíndík beríldí.
Máselen, «Almaty-2» temírjol vokzalynda poıyz jolseríkterí №336 saılau uchaskesíne esepten shyǵaru kuálígímen kelíp, dauys berdí. Vokzaldaǵy uchaske azamattardyń uaqytsha bolatyn jerlerínde ūıymdastyrylǵan dauys beru oryndarynyń bírí boldy.
Qalanyń kommunaldyq kásíporyndarynyń qyzmetkerlerí de saılau nauqanyna qatysty. «Almatyjylujaıenergo» qyzmetkerlerí men olardyń kámeletke tolǵan otbasy múshelerí qaladaǵy tıístí uchaskelerde dauys berdí. Kásíporyn ūsynǵan málímet boıynsha, onyń qyzmetkerlerí men otbasy músheleríníń 1 414-í Almatydaǵy saılau uchaskeleríne tírkelgen.
Saılau uchaskelerí merekelík alańǵa aınaldy
Būl kúnníń erekshelígí – dauys beru protsesí bírqatar audanda merekelík ís-sharalarmen qatar júruí.
Saılau uchaskeleríníń janynda tūrǵyndarǵa arnalǵan jármeńkeler, sauda alańdary, fotoaımaqtar ūıymdastyryldy. Balalar men eresekter ūlttyq oıyndarǵa qatysyp, asyq atyp, arqan tartyp, láńgí teptí.
Keı uchaskelerde muzyka oınap, tūrǵyndar bír-bírímen suretke túsíp, saılau kúní otbasylyq demalyspen ūshtasty.
Saılauǵa futboldyń «jūldyzdary» da keldí
Almatydaǵy saılau kúní ázíl men kreatıvten de kende bolǵan joq.
Bostandyq audanyndaǵy saılau uchaskeleríníń bírínde Messı men Ronaldu keıpíndegí tūrǵyndar paıda bolyp, futbol dobymen shaǵyn shou kórsettí. Erekshe obrazben kelgen saılaushylar tūrǵyndarmen suretke túsíp, uchaskedegí jūrttyń kóńíl kúıín kóterdí.
Mūndaı tosyn sátter sayası nauqannyń resmı sıpatyn jeńíldetíp, Almatydaǵy saılau kúníníń ózíndík atmosferasyn kórsettí.
Áleumettík jelíler da saılauǵa qatysty
Saılau uchaskelerínen áleumettík jelíde tanymal jelí kıímín kıgenderdí de kezdestíruge boldy. Olar óz tańdaularyn jasap qana qoımaı, saılau kúníndegí sátterdí oqyrmandarymen bólísíp, azamattyq belsendílík tanytty.
Bír qala – myńdaǵan taǵdyr, bír tańdau kúní
Almatydaǵy Qūryltaı saılauy bír kúnníń íshínde qalanyń san qyrly kelbetín kórsettí.
Tańǵy saǵat altyda jūmysyn bastaǵan mamandandyrylǵan uchaskeler, jetíden bastap qalyptasqan kezek, balasyn ertíp kelgen jas otbasylar, alǵash ret dauys bergen jastar, ómírlík tájírıbesí mol qarıyalar, sportshylar, óner maıtalmandary, dárígerler, mūǵalímder, kommunaldyq sala men temírjol qyzmetkerlerí – bárín bír kún, bír oqıǵa bíríktírdí.
Bíreu saılau uchaskesíne úıínen bírneshe júz metr júríp keldí. Bíreu oqu-jattyǵu jıynynda júríp esepten shyǵaru kuálígín aldyn ala rásímdedí. Al Meńdíbaı Álímǵazınov elordadan Almatyǵa deıín 1300 shaqyrymǵa juyq joldy júgíríp ótíp baryp dauys berdí.
Bír jerde adamdar kezekte tūrdy, endí bír jerde muzyka oınady. Bír uchaskede úlkender tańdau jasap jatsa, aulada balalar asyq oınady. Qalanyń bír būryshynda sport chempıondary dauys berse, ekínshí jaǵynda sahna sańlaqtary saılau jáshígíne byulleten saldy.
23 tamyzdaǵy Almatynyń bír kúní osyndaı kadrlardan qūraldy.
Al būl fotosuretter – Qūryltaı deputattaryn alǵashqy saılauda Almatynyń qalaı tańdau jasaǵanyn kórsetetín bír kúndík shejíre.