Jol kartasy qalalyqtardyń ómir súrý sapasyn jaqsartýǵa baǵyttalǵan 32 maqsatty ındıkatorlardy qarastyrǵan.
Almaty qalasy ákiminiń orynbasary Erjan Babaqumarov pen Nur Otan partıasy Almaty qalalyq fılıalynyń birinshi orynbasary Meıirjan Otynshıev Nur Otan partıasy saılaýaldy baǵdarlamasynyń Jol kartasyn Almatyda júzege asyrý máseleleri boıynsha onlaın-keńes ótkizdi, dep habarlaıdy Almaty-akshamy.kz.
Jıynǵa qala ákiminiń orynbasary İ. Óserov pen qalalyq basqarmalardyń basshylary da qatysty.
Keńeste partıanyń saılaý aldyndaǵy ýádeleri aıasynda iske asyrylýy josparlanǵan áleýmettik jáne ınfraqurylymdyq jobalar talqylandy. Atap aıtqanda, bilim berý jáne densaýlyq saqtaý salasyndaǵy jobalar. Qalanyń jaıly qalalyq orta, bilim, qoǵamdyq densaýlyq basqarmalary basshylarynyń, sonymen qatar birqatar aýdan ákimderiniń aqparattary tyńdaldy.
Jalpy, 2025 jylǵa deıingi megapolıstegi Jol kartasy aıasynda bilim berý jáne densaýlyq saqtaý salasynda 400-den astam jobany júzege asyrý josparlanǵan. Onyń ishinde – jańa nysandardyń qurylysy, bar ǵımarattardy jóndeý jáne seısmıkalyq kúsheıtý.
Búginde 240 balaǵa arnalǵan eki memlekettik balabaqshanyń qurylysy aıaqtaldy, 30 jekemenshik mektepke deıingi mekeme ashyldy, mektep pen medısınalyq mekeme kúrdeli jóndeýden ótti. 100-den astam bilim berý jáne densaýlyq saqtaý nysandarynda jobalaý jáne qurylys jumystary bastaldy. Sonymen qatar, pandemıamen júrgizilip jatqan kúresti eskere otyryp, birqatar jobalardy iske asyrý merzimderi qaıta qaraldy. Atap aıtqanda, OQKA jansaqtaý pavılondary men qabyldaý bólmesin jóndeý epıdemıologıalyq ahýal jaqsarǵanǵa deıin keıinge qaldyryldy.
Ákimniń orynbasary Erjan Babaqumarov halyqtyń suranystaryn eskere otyryp, josparlanǵan áleýmettik jobalardy iske asyrýdyń mańyzdy ekenin aıtty. Atap aıtqanda, medısınalyq mekemeler joq shaǵyn aýdandarda otbasylyq-dárigerlik ambýlatorıalar salynady. Bul qala turǵyndaryn qadamdyq qashyqtyqta medısınalyq qyzmettermen qamtýǵa múmkindik beredi.
Keńestiń qorytyndysy boıynsha jaýapty basqarmalarǵa partıanyń qalalyq fılıalymen birge Jol kartasy tarmaqtarynyń oryndalýyn baqylaýdy kúsheıtý tapsyryldy.
Eske salsaq, partıanyń Almaty qalasy boıynsha Jol kartasy osy jyldyń aqpan aıynda usynylyp, bekitilgen bolatyn. Jalpy, Jol kartasy qalalyqtardyń ómir súrý sapasyn jaqsartýǵa baǵyttalǵan 32 maqsatty ındıkatorlardy qarastyrǵan.