Jobanyń basty míndetteríníń bírí – «Medeudíń» sáulettík kelbetín saqtau, dep habarlaıdy aqshamnews.kz tílshísí.
Aumaǵy 10,5 myń sharshy metr bolatyn mūz alańy, jańa salqyndatu júıesí, jańartylǵan ınjenerlík jelíler men sportshylarǵa arnalǵan zamanauı bólmeler – ańyzǵa aınalǵan sport keshenín osyndaı ózgerís kútíp tūr.
Almaty qalasy Qūrylys basqarmasy ókílderíníń aıtuynsha, nysanda jūmys bírden bírneshe baǵyt boıynsha júrgízílude. Búgínde trıbunalardy nyǵaıtu, shatyrdy ornatu, qasbettí sándík árleu jáne trıbunalardy gıdrooqshaulau jūmystary tolyq ayaqtaldy. Sondaı-aq jylu jáne elektrmen jabdyqtau ınjenerlík jelílerí tartyldy.
Ǵımarat íshíndegí bólmelerdí daıyndau jūmystary jalǵasyp jatyr. Qazír qūrylysshylar syrtqy jylu oqshaulaǵyshtaryn ornatyp, íshkí qabyrǵalardy qaptau jáne jylumen jabdyqtau jelílerín júrgízu jūmystaryn atqaruda.
Qaıta jańǵyrtudyń mańyzdy baǵyttarynyń bírí – aumaǵy 1,3 myń sharshy metr bolatyn mashına zaly. Mūnda monolıttí qūrylys jūmystary júríp jatyr. Dál osy bólmede keshenníń ınjenerlík jáne salqyndatu júıeleríníń jūmysyn qamtamasyz etetín jabdyqtar ornalastyrylady.
Jańǵyrtu jūmystarynyń taǵy bír mańyzdy baǵyty – mūz alańyn jańartu. Onyń jalpy aumaǵy 10 myń sharshy metrden asady. Joba ayasynda mūz tóseletín tehnologıyalyq plıta men salqyndatu júıesí tolyǵymen jańartylady. Būl syrtqy aua temperaturasy +15 gradusqa deıín kóterílse de, mūzdyń sapasyn saqtauǵa múmkíndík beredí.
Sonymen qatar energıya tıímdílígín arttyruǵa baǵyttalǵan sheshímder engízílude. Tehnologıyalyq úderísterdí avtomattandyru jáne jylumen jabdyqtau júıesín tabıǵı gazǵa kóshíru kózdelgen. Sonyń nátıjesínde energıya resurstaryn tūtynu kólemí 25-30%-ǵa azaımaq.
Ózgerís sportshylarǵa arnalǵan ınfraqūrylymdy da qamtıdy. Shyǵys trıbunanyń astynda tóreshílerge arnalǵan bólme, dopıng-baqylau aımaǵy jáne árqaısysynyń aumaǵy shamamen 50 sharshy metr bolatyn segíz zamanauı kıím auystyru bólmesí jabdyqtalady.
«Medeu» qonaq úıín jańartu jūmystary da jalǵasyp jatyr. Jańǵyrtudan keıín qonaq úı bír mezgílde 140 sportshyny qabyldaı alady. Būl keshen bazasynda tolyqqandy oqu-jattyǵu jıyndaryn ótkízuge múmkíndík beredí.
Būl rette jobanyń basty míndetteríníń bírí «Medeudíń» sáulettík kelbetín saqtau. Sondyqtan qaıta jańǵyrtu jūmystary negízínen íshkí qūrylymdardy, ınjenerlík jelílerdí jáne tehnologıyalyq jabdyqtardy jańartuǵa baǵyttalǵan. Keshenníń tarıhı kelbetí ózgeríssíz saqtalady.