«Alatau» teatrynyń artısterí «Aqqu júrek» atty poezıyalyq kompozıtsıya ūsyndy, dep habarlaıdy aqshamnews.kz tílshísí.
Alatau dástúrlí óner teatrynda belgílí qazaq aqyny Marfuǵa Aıtqojanyń 90 jas mereıtoıyna arnalǵan «Jyr aqquy – Marfuǵa» atty shyǵarmashylyq kesh óttí. Mereıtoı ıesín qūttyqtauǵa jazushylar, aqyndar, belgílí óner qaıratkerlerí men shyǵarmashylyq zıyaly qauym ókílderí jınaldy. Ís-shara Almaty ákímdígíníń qoldauymen ūıymdastyryldy.
Marfuǵa Aıtqoja – Memlekettík syılyqtyń laureaty, Qazaqstannyń halyq jazushysy, Qazaqstannyń eńbek síńírgen qaıratkerí, Almaty qalasynyń Qūrmettí azamaty, «Barys», «Parasat» jáne «Qūrmet» ordenderíníń ıegerí. Tuǵan jer, mahabbat, adam sezímí men halyq taǵdyryn arqau etken shyǵarmalary qazaq poezıyasynda aıryqsha oryn alady.
Mereıtoı keshín dırıjer Jeksen Aısynnyń jetekshílígímen Qūrmanǵazy atyndaǵy Qazaq memlekettík akademıyalyq halyq aspaptar orkestrí ashty. Muzykalyq qoıylymdar aqynnyń ómírí men shyǵarmashylyǵyn tanystyrǵan poezıyalyq kompozıtsıyalarmen alma-kezek órílíp otyrdy.
Keshte Qazaqstannyń halyq artısí Shahımardan Ábílov, Qazaqstannyń eńbek síńírgen qaıratkerlerí Mahmūt Toıkenov, Gúlzat Dáuírbaeva, Ádílet Jeksenbı, Tílebek Qojanūly, Erkín Shúkíman, Qabylash Ábíkeıūly jáne halyqaralyq baıqaulardyń laureaty Nūrsūltan Sabırov óner kórsettí.
Baǵdarlamadaǵy erekshe qoıylymdardyń bírí akter Bolat Ábdílmanov oryndaǵan «Abaı amanaty» monology boldy. Al «Alatau» teatrynyń artısterí «Aqqu júrek» atty poezıyalyq kompozıtsıya ūsyndy.
Kesh qonaqtarynyń qatarynda Almaty qalasy ákímíníń orynbasary Abzal Núkenov pen Qazaqstan Jazushylar odaǵy tóraǵasynyń orynbasary Ǵalym Qalıbekūly boldy. Olar aqyndy mereıtoıymen qūttyqtady.
Kesh sońynda Marfuǵa Aıtqoja kórermenderge alǵys bíldírdí. Sondaı-aq Almaty ákímdígíne, ūıymdastyrushylarǵa, óner kórsetken artısterge jáne mereıtoı quanyshyn bírge bólísuge kelgen barsha qauymǵa rızashylyǵyn jetkízdí.