Almatydaǵy Yqylas atyndaǵy halyq muzykalyq aspaptar muzeıínde «Etnoálem: Bír shańyraq astynda» atty kórme óz jūmysyn bastady.
Qazaqstan halqy Assambleyasynyń 30 jyldyǵyna oraı «Afrıkalyq etno- mádenı ortalyqpen» bírlesíp ūıymdastyrylǵan būl kórmeníń basty maqsaty – Qazaqstanda ómír súríp jatqan túrlí etnostardyń baı mádenı mūrasyn keńínen tanystyryp, etnosaralyq kelísím men ózara qūrmettí nyǵaıtu. Ís-shara qoǵamdaǵy beıbítshílík pen tatulyqty dárípteı otyryp, kelushílerge ár etnostyń bolmysyn, tūrmys-tírshílígín, ónerí men dástúrlerín tereńírek tanuǵa múmkíndík beredí.
Kórmede afrıka halyqtarynyń muzykalyq aspaptary, ūlttyq kıímderí, tūrmystyq būıymdary men qolóner tuyndylary ūsynylǵan. Afrıka halqynyń mádenıetí men tarıhyna arnalǵan bólím kórermender tarapynan erekshe qyzyǵushylyq tudyryp otyr. Būl bólímde afrıkalyq muzykalyq aspaptar, sándík-qoldanbaly óner tuyndylary jáne etnıkalyq nyshandar kópshílík nazaryna ūsynylǵan. Kelushíler úshín būl kórme – tek mádenı tanysu alańy ǵana emes, sonymen bírge ūltaralyq dostyq pen yntymaqtastyqty nyǵaıtatyn mańyzdy platforma.
Kórme qonaqtary ashylu saltanatynda Afrıka halqynyń ūlttyq muzykalyq aspaptarymen keńínen tanysty. Ásírese, afrıkalyq djembe barabany erekshe qyzyǵushylyq tudyrdy. Ís-shara barysynda ūlttyq ónerdíń toǵysuyn beıneleıtín muzykalyq qoıylym ūıymdastyrylyp, onda afrıkalyq djembeníń úní men qazaqtyń tól aspaby – dombyranyń kúmbírí úılesím tauyp, kórermenderdíń ystyq yqylasyna bólendí. Būl erekshe muzykalyq sıntez – tek ónerdíń shekarasy bolmaıtynyn ǵana emes, mádenıetterdíń úndestígín de aıqyn kórsettí. Dombyra men djembe úní arqyly túrlí halyqtardyń bír shańyraq astyndaǵy tatulyǵy men ruhanı jaqyndyǵy aıqyn sezíldí.
Qazaqstan halqy Assambleyasy – eldegí tūraqtylyq pen bírlíktíń sımvolyna aınalǵan bíregeı qūrylym. Osy oraıda qolǵa alynǵan «Etnoálem: Bír shańyraq astynda» kórmesí qoǵamdyq kelísím men jalpyūlttyq bíregeılíktí damytu jolyndaǵy ıgí bastamalardyń bírí bolyp otyr.
Kórme 2025 jyldyń 12 tamyzyna deıín jalǵasady.