Almatyda áleumettík jelíde kóp áıel aludy nasıhattaǵan er adamǵa aıyppūl salyndy, – dep habarlaıdy aqshamnews.kz tílshísí.
Almaty qalalyq polıtsıya departamentíníń málímetínshe, áleumettík jelídegí paraqshalardyń bírínde Qazaqstan zańnamasyna jáne qoǵamda qalyptasqan adamgershílík qūndylyqtarǵa qaıshy ómír salty ashyq nasıhattalǵan. Jazba avtory úsh áıelí baryn kórsetíp, sol úshín synaǵandarǵa «bízge báríbír» dep jauap bergen.
Tekseru barysynda jazbanyń avtory anyqtalyp, oǵan qatysty ákímshílík shara qoldanyldy. Qūqyqqa qaıshy kontent jarıyalaǵan er adamǵa Ákímshílík qūqyqbūzushylyq turaly kodekstíń 456-2-babynyń 3-1-bólígí boıynsha hattama toltyryldy.
Profılaktıkalyq áńgímeden keıín ol áleumettík jelídegí jazbalaryn óz erkímen óshírdí, – dedí Almaty qalalyq polıtsıya departamentíníń ókílí.