Almaty qalasy polısıa departamentiniń kıberqylmysqa qarsy is-qımyl basqarmasy "Kıberalaıaqtyqqa qarsy is-qımyl salasyndaǵy eń senimdi seriktes" nomınasıasynda birinshi oryndy ıelendi, - dep habarlaıdy Aqshamnews.kz.
Marapattaý "Ortalyq Azıa Fınteh" samıti aıasynda ótti. Atalǵan alań dástúrli túrde óńirdegi sıfrlyq ekonomıkanyń damýy men qaýipsizdigin qamtamasyz etetin jetekshi sarapshylar men uıymdardy biriktiredi. Qazylar alqasy almatylyq kıberpolısıanyń kıberqylmystardyń aldyn alý, anyqtaý jáne ashýdaǵy júıeli jumysynyń, sondaı-aq qarjy ınstıtýttary, IT-kompanıalar jáne qoǵamdyq uıymdarmen ózara tıimdi áriptestigin joǵary baǵalady. Sarapshylar aqparat almasýdyń jedeldigi men tıimdiligin, analıtıkalyq qoldaýdyń sapasyn, ınsıdentterge der kezinde den qoıýdy jáne azamattardy zańsyz onlaın-tranzaksıalardan, fıshıngten jáne ınternet-alaıaqtyqtyń ózge de túrlerinen qorǵaýǵa baǵyttalǵan keshendi sharalardy erekshe atap ótti.
– Bul marapat – tek qurmet belgisi emes, sonymen birge «Zań jáne tártip» qaǵıdatynyń basym baǵyttaryna saı kele otyryp, bizdiń tańdaǵan baǵytymyzdyń durystyǵyn dáleldeıtin mańyzdy kórsetkish. Sıfrlyq ortadaǵy azamattardyń qaýipsizdigin qamtamasyz etý – strategıalyq mindet. Sondyqtan biz qarjy uıymdarymen, IT-sektorymen jáne qoǵammen ózara is-qımyldy júıeli túrde kúsheıtip kelemiz. Kıberalaıaqtardyń ádis-tásilderi kún saıyn ózgerýde. Sol sebepti biz aldyn alý sharalaryn, halyqtyń sıfrlyq saýattylyǵyn arttyrýdy, jedel áreket etýdi jáne analıtıkalyq múmkindikterdi damytýdy basty nazarda ustaımyz. Maqsatymyz – Almaty turǵyndarynyń sıfrlyq keńistikte kez kelgen áreketti qaýipsiz oryndaýyna jaǵdaı jasaý. Samıt uıymdastyrýshylary men seriktesterge senimi men joǵary baǵasy úshin alǵys aıtamyn. Bul marapat bizdiń ujym úshin azamattardyń qaýipsizdigin nyǵaıtý jáne kıberqylmystarǵa qarsy kúresti odan ári tıimdi júrgizýge zor serpin beredi, – dedi Almaty qalasy Polısıa departamentiniń Kıberqylmysqa qarsy is-qımyl basqarmasynyń bastyǵy Ánes Qaldybaev.