Almatyda 3,6 myńnan astam sport nysany jūmys ísteıdí. Būl turaly qalalyq Sport basqarmasynyń ókílderí aıtty.
2024–2025 jyldary alty jańa dene shynyqtyru-sauyqtyru keshení paıdalanuǵa beríldí, sondaı-aq jeke ınvestıtsıya esebínen ekí sport keshení boı kóterdí. Alatau audanyndaǵy Nūrkent shaǵynaudanynda ınvestorlar ayaqtaǵan jańa tennıs ortalyǵy ashyldy. «Tūlpar» keshení ūlttyq sport túrlerín damytu úshín kommunaldyq menshíkke qaıtaryldy, Raıymbek dańǵylynda erekshe qajettílígí bar adamdarǵa arnalǵan sport ortalyǵynyń qūrylysy bastaldy.
2027 jyldyń sońyna deıín Nauryzbaı, Alatau jáne Túrksíb audandarynda jalpy audany 71 myń sharshy metr bolatyn alty dene shynyqtyru-sauyqtyru keshení salu josparlanyp otyr. Sondaı-aq úsh sport mektebín jańǵyrtu kózdelgen: №9 sport mektebí úshín seısmıkalyq kúsheıtumen bírge kúrdelí jóndeuge qūjattama ázírleníp jatyr; sportta daryndy balalarǵa arnalǵan mektep-ınternat saraptamanyń oń qorytyndysyn aldy; №2 sport mektebí úshín kúrdelí jóndeu jobasy jasalyp jatyr.
Bíregeı jobalardyń qatarynda FIFA jáne UEFA standarttaryna sáıkes 15 gektar aumaqta 40 myń oryndyq jańa futbol stadıonynyń qūrylysy, sondaı-aq 2 gektar aumaqta tóbesíníń bıíktígí 17 metr bolatyn kórkem gımnastıka ortalyǵyn salu bar. Būl halyqaralyq jarys ótkízuge múmkíndík beredí. Ortalyq stadıonda sáulettík kelbetí men jeńíl atletıka jolaqtaryn saqtaı otyryp, jańartu júrgízu josparlanǵan. Sonymen qatar «Medeu» bıík tauly sport keshenín jańǵyrtu bastaldy. Jańǵyrtu ayasynda keshenníń tarıhı kelbetí saqtala otyryp, tolyq jańartu júrgízíledí. Injenerlík jelíler jańartylyp, zamanauı ınfraqūrylym jasalyp, sportshylar men qonaqtarǵa arnalǵan jaǵdaı jaqsartylady.
Būǵan qosa, jyl sońyna deıín Almatyda 20-dan astam mūz aıdynyn ashu josparlanǵan, dep atap óttí qalalyq Sport basqarmasynyń ókílderí.