Almaty qalalyq kardıologıalyq ortalyǵynda qarasha aıynda alǵash ret júrek transplantasıasy jasalǵan 34 jastaǵy naýqas aýrýhanadan shyǵaryldy. Qazirgi ýaqytta onyń jaǵdaıy turaqty. Bul týraly Almaty qalasy Qoǵamdyq densaýlyq saqtaý basqarmasynyń ókilderi aıtty.
Atalǵan naýqas – sozylmaly júrek jetkiliksizdiginiń sońǵy satysyna shaldyqqan 34 jastaǵy azamat. Ol buǵan deıin júrek aýystyrý otasyn kútip, respýblıkalyq kezekte turǵan.
Bes saǵattan astam ýaqytqa sozylǵan júrek aýystyrý otasy sátti aıaqtaldy. Kúrdeli otany Almaty qalalyq kardıologıalyq ortalyǵynyń bilikti mamandarynan quralǵan mýltıdısıplınarlyq komanda Astanadaǵy University Medical Center dárigerlerimen birlesip jasady. Oǵan Qalalyq kardıologıalyq ortalyqtyń dırektory Ermaǵambet Qýatbaev pen UMC korporatıvtik qory basqarma tóraǵasy, profesor Pá Iýrıı Vladımırovıch jetekshilik etti. Qajetti qoldaý kórsetý úshin UMC mamandary Almatyǵa jedel túrde keldi.
Qalalyq kardıologıalyq ortalyqta joǵary tehnologıalyq ota jasaýǵa barlyq qajetti jaǵdaı jasalǵan. Munda bilikti kardıologtar, kardıohırýrgter, anestezıolog-reanımatologtar, perfýzıologtar men operasıalyq meıirbıkeler qyzmet atqarady. Zamanaýı dıagnostıkalyq jáne emdeý ádisteri engizilip, halyqaralyq standarttarǵa saı jabdyqtar qoldanylady.
Saýyqqan naýqas dárigerler men medısına qyzmetkerlerine shynaıy rızashylyq bildirip, árbir kezeńde kórsetilgen qamqorlyq pen kásibı biliktilikti erekshe atap ótti. Onyń aıtýynsha, búginde ol jaqyndarynyń janynda bolyp, ómirge qaıta oralýdyń qadirin burynǵydan da jaqsy sezinedi.
«Aýrýymnyń bári energetık sýsyndardan bastaldy. Basynda kúnine bir bótelkemen shektelsem, keıin kún saıyn 8-10 energetıkalyq sýsynǵa deıin jettim. Munyń sońy aýyr dıagnozǵa ákeletinin ańǵarmappyn. Búgin men dárigerlerdiń jankeshti eńbeginiń arqasynda tirimin. Endi densaýlyqtyń adam ómirindegi eń úlken baılyq ekenin anyq túsindim», – dedi naýqas.
Aýrýhanadan shyqqannan keıin naýqas tirkelgen emhanasynda dárigerlerdiń turaqty baqylaýynda bolady. Júrek transplantasıasyn qosa alǵanda, stasıonarlyq em, qajetti dári-dármekpen qamtamasyz etý, ońaltý jáne keıingi medısınalyq baqylaý memlekettik kepildik berilgen tegin medısınalyq kómek aıasynda memleket esebinen kórsetiledi.
Eske sala keteıik, arterıalyq gıpertenzıanyń aýyr túrimen aýyrǵan, ınsýlt alǵan 50 jastaǵy áıel donor boldy. Almaty qalalyq ortalyq klınıkalyq aýrýhanasyna shuǵyl túrde jetkizilgennen keıin dárigerler konsılıýmy onyń mı ólimin anyqtap, máıittik donorǵa ruqsat berdi. Marqumnyń týystary kelisimin bergen soń donorlyq úderis uıymdastyryldy.