Jeltoqsan kóshesínde BRT (Bus Rapid Transit) jelísíníń íske qosyluyna baılanysty qozǵalysty ūıymdastyrudyń jańa syzbasy engízíledí, dep habarlaıdy aqshamnews.kz
Ūzyndyǵy 4,6 shaqyrym bolatyn jańa jelí Tımıryazev kóshesíndegí qoldanystaǵy BRT uchaskesí men Raıymbek batyr dańǵyly boıynda salynyp jatqan aumaqty jalǵap, ońtústíkten soltústíkke qaraı úzdíksíz jyldam avtobus qatynasyn qamtamasyz etedí.
Júrgízushílerge jol erejelerín qatań saqtap, joldaǵy tańbalar men belgílerge mūqıyat nazar audaru qajet. Atalǵan aumaqta qūqyqbūzushylyqty baqylauǵa alatyn foto jáne beıne tírkeu júıelerí de jūmys ísteıdí.
Joba ayasynda arnaıy jolaqtar jol boıynyń shetínde ornalastyrylǵan. Mūndaı sheshím tūraqta tūrǵan kólíkter men keptelísten bolatyn qolaısyzdyqtardy azaıtuǵa múmkíndík beredí. Soltústík baǵytqa qozǵalǵanda bólíngen jolaq kósheníń oń jaǵynda, al kerí baǵytta sol jaǵynda syzylǵan. Jeke avtokólíkter úshín Abaı dańǵylynan soltústíkke qaraı būrynǵydaı bírjaqty qozǵalys tártíbí jáne jolaq sany saqtalady.
Jańa baǵyttar boıynsha avtobustar 14 jeltoqsannan bastap ekí baǵytta da qatynaı bastaıdy. Alǵashqy kezeńde №92 jáne №59 marshruttaryn íske qosu josparlanyp otyr. Marshruttardyń naqty syzbasy men qozǵalys kestesí keıínírek jarıyalanady.
Aıta keterlígí, joba ayasynda barlyq jolaushyǵa qolaıly boluy úshín arnaıy kóteríńkí platformasy bar zamanauı ayaldama keshenderí ornatyldy. Sonymen qatar ekí qabat asfalt tóselíp, baǵdarshamdar, jol belgílerí, jaryqtandyru júıesí jańartylyp, trotuar plıtkalary arqyly júrgínshíler aımaǵy kóríktendíríldí.