Qalada medıtsınalyq-sanıtarlyq alǵashqy kómek (MSAK) ūıymdaryna halyqty tírkeıtín jyl saıynǵy nauqannyń qorytyndysy shyqty. Qalalyq bólímshe dırektorynyń orynbasary, QR DSM «Salıdat Qaıyrbekova atyndaǵy Ūlttyq densaulyq saqtaudy damytu ǵylymı ortalyǵynyń» ókílí Bıbígúl Aıtbaqına Óńírlík kommunıkatsıyalar qyzmetínde osylaı dedí.
Jyl saıynǵy tírkeu nauqany 1 qyrkúıekten 1 qarashaǵa deıíngí aralyqta óttí. Bıyl aktsıyaǵa 80 medıtsınalyq ūıym qatysqan, olardyń íshínde ekí jańa klınıka – Tengri Medical Clinic pen NaraMed te bar.
Nauqan qorytyndysy boıynsha 14 303 adam jańa MSAK ūıymdaryna tírkelíp, 14 822 tūrǵyn emhanasyn auystyrǵan. 2 394 841 adam tírkelgenímen, būl nauqan bastalǵanǵa deıíngí kórsetkíshten 519 adamǵa az.
«Tírkelgenderdíń kóbí ádettegídeı studentter, zeınetkerler men Almatyda uaqytsha tūryp jatqan azamattar bolyp otyr. Nauqandy josparly túrde, emhanalarǵa salmaq túsírmeı ótkízdík», – deıdí Bıbígúl Aıtbaqına.
15 qyrkúıekten bastap qaǵaz júzínde ótínísh beretínder úshín Face ID júıesí arqyly jańartylǵan sáıkestendíru júıesíne kóshu júzege asyryldy. Endí 18 jasqa deıíngí balalardy, múgedektígí bar adamdar men sottalǵandardy qospaǵanda, azamattardy tírkeu Face ID arqyly nemese Kaspi qosymshasyndaǵy jeke kodty kórsetu arqyly júrgízíledí. Būl jeke derektíń qorǵaluyn kúsheıtíp, ótíníshtíń qaıtalanuyna da jol bermeıdí.
«Tírkelgen halyqtyń tízímí» aqparattyq júıesí arqyly tírkelgen azamattyń deregíníń dūrystyǵyna baqylau jasalady. Onda JSN, tūrǵylyqty jerí, azamattyǵy men tírkeudíń ózektílígí avtomatty túrde tekseríledí. Derekterdí Áleumettík medıtsınalyq saqtandyru qory men Jeke tūlǵalardyń memlekettík derekter bazasymen salystyryp, toqsan saıyn baqylaıdy.
«Tsıfrlandyrudyń arqasynda jūmys barynsha yńǵaıly, ashyq óttí osy joly. Emhanaǵa barmaı-aq, bárí onlaın tírkele alady endí. Zeınetkerler men múgedektígí bar jandar sıyaqty keıbír sanattaǵy adamdar qūjattarymen oflaın tírkele beretín boldy», – dep tolyqtyrdy spıker.
Esteríńízge salsaq, emhanalarǵa tírkelu QR Densaulyq saqtau mınıstríníń būıryǵy boıynsha júzege asyp, azamattar tūrǵylyqty jerí men jūmys orny boıynsha medıtsınalyq ūıymdy ózí tańdap ala alatyndaı etíp ísteldí.