Óńirlik komýnıkasıalar qyzmeti alańynda «Daǵdarys ortalyqtarynyń odaǵy» zańdy tulǵalar birlestiginiń basqarma basshysy Zýlfıa Baısaqova uıymnyń 2025 jyldyń basynan bergi jumysynyń qorytyndysyn usyndy. Brıfıń 25 qarashada atap ótetin áıelderge qatysty zorlyq-zombylyqqa qarsy halyqaralyq kúnge oraı uıymdastyrylyp otyr, - dep habarlaıdy aqshamnews.kz.
Respýblıkalyq aksıa aıasynda qoǵamnyń bilimin arttyryp, túıitkildi talqylap, ony sheshý jolyn izdeýge baǵyttalǵan taqyryptyq is-sharalar ótkizilip jatyr. Buǵan deıin Qazaqstan, Ózbekstan, Qyrǵyzstan men Tájikstannan kelgen 110 maman qatysqan Ortalyq Azıa halyqaralyq konferensıasy ótken. Sarapshylar ózekti máselelerdi talqylap, zorlyq kórgenderdi qoldap, onyń aldyn alýǵa baılanysty tájirıbe almasty.
Stalkıng máselesine arnalǵan sarapshylar qatysatyn keńeıtilgen suqbat alańy men daǵdarys ortalyǵynda dóńgelek ústel ótkizý de josparda tur.
Zýlfıa Baısaqovanyń aıtýynsha, ótken jylmen salystyrǵanda turmystyq zorlyq-zombylyq deńgeıi bıyl birqalypty bolyp qalyp otyr.
«Áıelder jaǵy qaıdan kómek suraýǵa bolatyny týraly aqparatty kóbirek alyp, qoldaǵy bar quraldardy jıi paıdalana bastady», - dep atap ótti ol.
Sarapshynyń aıtýynsha, daǵdarys ortalyqtary óz qyzmetin keńeıtip, panalatýdyń ornyna kómektiń basqa da balama túri men áleýmettik demeý kórsetýdi damytyp jatyr. Bul ásirese aýyldyq jerdegi áıelderge kerek, óıtkeni olar úıi men sharýasyna alańdaǵandy qoıyp, balalaryna da qaraılap, sonymen birge mamandardyń qajetti qoldaýyn da alyp otyrady.
«Jan-Saıa» daǵdarys ortalyǵynyń zańgeri Gúlshara Saparovanyń aıtýynesha, psıhologtar zardap shekkenderdiń kóńilin ornyna túsirýge kómektesip, zańgerler qujattaryn qalpyna keltirip, tólemderin rásimdep, quqyqtardy túsindirýge qoldaý kórsetedi. Qazirgi ýaqytta Almatydaǵy daǵdarys ortalyqtary mynyndaı qyzmetter kórsetken:
• baspana qyzmetin 445 adam aldy (150 áıel, 295 bala)
• psıhologtyń keńesin – 1001 adam (722 áıel, 279 bala)
• zańger keńesin – 223 adam 811 suraq boıynsha
• jumyspen qamtylǵandar – 53 adam
• otbasymen qaıta qosylǵandar – 67 otbasy
• bastapqy kásibı daǵdylar kýrsynan ótkender – 6 adam
• jaldamaly turǵyn úıge shyqqandar – 42
• járdemaqy resimdelgen – 5
• qujattary qalpyna keltirilgen – 7
• turǵylyqty jeri boıynsha tirkelgen – 1
• basqa ortalyqtarǵa baǵyttalǵandar – 13
2017 jyly daǵdarys ortalyǵy qurylǵaly beri onyń qyzmetin 11 615 adam paıdalanǵan. Onyń ishinde baspana qyzmetin – 3346 adam,
• psıholog kómegin – 5558 adam
• zańger kómegin – 1823 adam
• jumyspen qamtýǵa járdemdesý – 652 adam
• otbasymen qaıta qosylǵandar – 416 otbasy
• bastapqy kásibı daǵdylar kýrsynan ótkender – 467 adam
• jaldamaly turǵyn úıde óz betinshe turyp jatqan otbasy – 606
Daǵdarys ortalyǵynyń saıtyna 818 adam keńes alý úshin júgingen.
Sarapshylardyń aıtýynsha, zańnamadaǵy ózgerister qoǵamdyq jaýapkershilikti arttyryp, Almaty men basqa óńirlerdiń turǵyndary turmystyq zorlyq-zombylyq kórgeni týraly jıi habarlaı bastaǵan.
Zýlfıa Baısaqova zańnamany jetildirýdi jalǵastyryp, áleýmettik qyzmetterdiń múmkindigin keńeıtý qıyn jaǵdaıǵa tap bolǵan áıelderdi budan da tıimdirek qoldaýǵa múmkindik beretinin atap ótti.