Almaty qalasynda jańa jyl qarsańynda dástúrli otbasylyq marafon uıymdastyryldy. Almaty Arena aýmaǵynda ótken shara «Bir maqsat. Bir baǵyt» uranymen ótip, qala turǵyndary men qonaqtaryn ortaq baǵytqa burdy.
İs-shara Alataý aýdany ákimdiginiń qoldaýymen uıymdastyrylyp, BI Group, Bazis-A jáne Sensata Group kompanıalary demeýshilik kórsetti. Kórsetilgen qoldaýdyń nátıjesinde marafonǵa qatysý kópshilikke qoljetimdi boldy. Marafon baǵdarlamasy balalar men eresekterge arnalǵan ınteraktıvti alańdarmen tolyqty.Marafonǵa qatysyp márege jetken barlyq júgirgishke estelik medal tabystalyp, eń erekshe obrazdaǵy qatysýshylar «Eń úzdik kostúm» nomınasıasy boıynsha arnaıy júldege ıe boldy. Shara barysynda qatysýshylar sımvolıkalyq 2026 metr qashyqtyqty júgirip ótti. Bul qashyqtyq jańa jyldy belsendi túrde qarsy alýdyń belgisine aınaldy.
Uıymdastyrýshylardyń málimetinshe, marafonǵa 1500 adamǵa arnalǵan slot usynylyp, olardyń basym bóligi aldyn ala tirkeldi. Alataý aýdany sońǵy jyldary qarqyndy damyp kele jatqan, sporttyq ınfraqurylymy qalyptasqan aýdan retinde erekshelenedi. Osyndaı buqaralyq sporttyq is-sharalar turǵyndar arasynda salaýatty ómir saltyn nasıhattap, jańa jyldy otbasymen birge qarsy alý dástúrin nyǵaıta túsýde.
Marafonda ınklúzıvtilikke erekshe kóńil bólindi. Jarysqa Alataý aýdanyndaǵy erekshe qajettiligi bar balalar, Meiirim ońaltý ortalyǵynyń tárbıelenýshileri, sondaı-aq Astanadan kelgen «Janasý – Prıkosnovenıe» qorynyń qatysýshylary qatysty. Marafonǵa qatysýshy Baıan Tursynbaevanyń aıtýynsha, mundaı sharalar otbasylyq qarym-qatynasty arttyrady. «Biz marafonǵa arnaıy úndisterdiń kıimin kıip keldik. Aýa raıy sýyq bolǵanymen, kóńil kúıimiz jaqsy boldy. Kostúmderdi bir aı boıy óz qolymyzben daıyndadyq. Osyndaı otbasylyq sharalar kóp bolsa eken», – dedi ol.
«Bir maqsat. Bir baǵyt» uranymen ótken marafon almatylyqtar úshin sport pen merekeni ushtastyrǵan mazmundy ári este qalarlyq oqıǵa boldy.