11–12 qazan kúnderi Almatyda «Bereke Fest» respýblıkalyq bastamasy aıasynda keńeıtilgen aýyl sharýashylyǵy jármeńkesi ótedi.
Oǵan Almaty oblysynyń taýar óndirýshileri, qala kásiporyndary jáne Abaı oblysynyń fermerleri qatysady, - dep habarlaıdy Aqshamnews.kz.
Basty maqsat – áleýmettik mańyzy bar azyq-túlik baǵasyn turaqtandyrý, otandyq óndirýshilerdi qoldaý jáne turǵyndardy qoljetimdi ári sapaly ónimmen qamtamasyz etý.
Jármeńke – bastamanyń negizgi is-sharasynyń biri. Almatylyqtar deldalsyz, tikeleı fermerlerden jańa ónim satyp ala alady. İs-sharaǵa Almaty oblysynyń on aýdany men Semeı qalasy qatysady.
Jármeńkede kókónis pen jemis-jıdek, sút ónimderi, shujyq, jarma, un jáne maı túrleri syndv 50-den astam túrli ónim usynylady.
Sonymen qatar, Abaı oblysynan 150 tonna et jetkiziledi. Jalpy kólemi 370 tonna aýyl sharýashylyǵy ónimi usynylady, onyń ishinde 60 tonna sút ónimi, 50 tonna kókónis-jemis, 30 tonna balyq jáne 80 tonna ózge de taýarlar bar.
Jármeńke 11-12 qazan kúnderi saǵat 8:00-den 17:00-ge deıin Qazybek bı kóshesinde, Abylaı han men Panfılov kósheleriniń arasyndaǵy aýmaqta ótedi.