Almatyda medıasala ókílderí arasynda shaǵyn futboldan jyldaǵy qalalyq jarys bolyp óttí. Bıyl besínshí ret ūıymdastyrylyp otyrǵan turnırde Qalalyq óńírlík kommunıkatsıyalar qyzmetí jurnalıster men blogerlerdíń taǵy basyn qosty. Būl jolǵysynda jurnalıster júldege bola ǵana jaryspaı, bír-bírímen baılanysyp, tanysyp, jaqsy uaqyt ótkízíp qaıtty, – dep habarlaıdy aqshamnews.kz tílshísí.
Oıyn 25 sáuír kúní «Pride PFC» futbol klubynyń bazasynda óttí. Turnırge ártúrlí redaktsıyadan kelgen 10 komanda qatysty. Ár komandada 8 oıynshyǵa deıín boldy: 5 oıynshy alańda, 3 oıynshy qosalqy qūramda. Kásíbı futbolshylardyń jarysqa qatysuyna tyıym salyndy, Būl kíleń áuesqoılar qatysqan jarystyń barynsha teń deńgeıde ótuíne múmkíndík berdí.
Soǵan qaramastan, alańdaǵy tartys kásíbı matchtan kem túsken joq: shapshań shabuyldap, úlken oıyndaǵydaı aıtys-tartys pen áserlí sátterí kóp boldy.
Almaty qalasy ákímíníń orynbasary Abzal Núkenov jarysqa qatysqandardy qūttyqtap, sóz sóıledí. Ol qala bılígíníń BAQ ókílderíníń bastamasyn únemí qoldap, báríníń osylaı basyn qosyp otyruǵa yntaly ekenderín jetkízdí.
«Almatynyń ákímdígí jurnalısterdíń bastamasyn únemí qoldap, olardyń baılanysyn nyǵaıtyp, komandalyq ruh qalyptastyrǵanyn qalaıdy. Būl jarys — sportqa ıkemdí ekeníńdí kórsetíp, jurnalısterdíń sózge ǵana emes, íske de sheber ekenín dáleldeıtín úlken múmkíndík. Oıyn árqaısysynyń esínde qalatyndaı bolyp ótíp, jeńísten jeńíske jete beríńízder», — dedí.
Qazaqstandyq sporttyń ańyzy, futbol ardagerí Qūralbek Ordabaev ta jarysqa qonaq bolyp keldí. Būryn almatylyq «Qaırat» klubynyń negízgí qaqpashysy bolǵan ol mūndaı bastama qoǵam úshín mańyzdy ekenín aıtady.
«Sporttyń ártúrlí mamandyq ıeleríníń basyn qosyp jatqanyn kóríp, quanyp qalasyń. Mūnda keremet áser alyp, komandalyq ruh ta osyndaı kezde qalypasady. Mūndaı jarys ásírese jastarǵa kerek. Futbol adamnyń mínezín shyńdaıdy, futbolda keıde jaqsy dos ta tabasyń», — dedí Ordabaev.
Jarystyń sońynda úzdík komandalar aqshalaı sertıfıkatpen marapattaldy:
1-oryn — 1 000 000 teńge, «Almaty» telearnasy
2-oryn — 750 000 teńge, «KTK» telearnasy
3-oryn — 500 000 teńge, «Alatau aqparat» ( «Vechernıı Almaty» men «Almaty Aqshamy» gazetí)
«Úzdík qaqpashy» nomınatsıyasy — Shoqan Mahanov («KTK» telearnasy)
«Úzdík qorǵaushy» — Zaır Begaly («Almaty» telearnasy)
«Úzdík shabuylshy» — Islam Noǵaı («Alatau aqparat»)
Jarysty ūıymdastyrǵan Óńírlík kommunıkatsıyalar qyzmetíníń basshysy Balsūlu Álekenova būl ís-sharanyń maqsaty — kásíbı qauymdastyqty ūıystyru túsu ekenín atap óttí.
«Bíz būl jarysty jurnalıster bírge jūmys ístep qana qoımaı, bírge demalyp, aralasyp, óz aralarynan dos tapsyn, ózderín úlken bír komandanyń múshesí retínde sezínsín dep ūıymdastyryp otyrmyz», — deıdí ol.
Qatysqandar da turnırdíń joǵary deńgeıde ūıymdastyrylǵanyn aıtty.
«Mūndaı oıyn jūmystan tys uaqytta áríptestermen erkín aralasuǵa múmkíndík beredí. Bárí ashylyp sóılesedí, mūndaı jarys jurnalısterdí ūıystyrady», — dedí «Habar» komandasynyń oıynshysy Sayat Shapaǵatov.
«Eshkím berílgísí kelmeı, qyzyqty óttí oıyn. Kádímgídeı kúsh-quat jınap qaıttyq», — deıdí «Informbyuro» 31 arnasynyń ókílí Kırıl Harlamov.
Jurnalıster aqparatpen ǵana jedel jūmys ístemeı, kerek kezde ūıymdasyp, naǵyz sportshyǵa tán mínez de kórsete alatynyn dáleldedí osy joly. Jyl saıyn būl jarystyń auqymy keńeıíp, Almatynyń medıaqauymdastyǵynyń mádenı jáne kásíbı ómíríníń mańyzdy bólígíne aınalyp bara jatyr.