Almatyda pedıatrıalyq shuǵyl kómekti damytýda mańyzdy qadam jasaldy — qalalyq balalar klınıkalyq juqpaly aýrýlar aýrýhanasy (QBKJAA) bazasynda medısınalyq kadrlardy oqytýdyń zamanaýı sımýlásıalyq ortalyǵy jumysyn bastady.
Jańa alań barlyq deńgeıdegi medısınalyq mamandardy balalarǵa shuǵyl jáne krıtıkalyq kómek kórsetýge daıyndaýǵa arnalǵan. Ortalyqtyń basty ereksheligi — pasıentterdi tartpaı, qaýipsiz jáne baqylanatyn ortada oqytý. Praktıkalyq daǵdylar naqty klınıkalyq jaǵdaılardy modeldeıtin joǵary dáldikti trenajerlarda jetildiriledi. Bul format halyqaralyq standarttarǵa sáıkes keledi jáne oqytýdy naqty tájirıbege barynsha jaqyndatady.
Ashylý kúni qonaqtarǵa ortalyqtyń múmkindikteri men iske asyrylyp jatqan oqytý baǵdarlamalary usynyldy: negizgi jáne keńeıtilgen júrek-ókpe reanımasıasy boıynsha trenıńter, orta medısınalyq personaldy daıarlaý tásilderi, tótenshe jaǵdaılarda komandalyq ózara is-qımyl qaǵıdattary. Zamanaýı sımýlásıalyq jabdyqtar men oqytý ádistemelerine erekshe nazar aýdaryldy.
Ortalyqta bazalyq reanımasıalyq is-sharalar, aýyr jáne synı jaǵdaılar kezindegi áreketter, balalarǵa alǵashqy kómek kórsetý boıynsha turaqty oqytý, sondaı-aq medısınalyq personaldyń komandalyq jumysyn pysyqtaý josparlanýda. PALS baǵdarlamalary boıynsha anestezıolog-reanımatolog dárigerler úshin keńeıtilgen reanımasıalyq oqytý qarastyrylǵan — shekteýli ýaqyt ishinde sheshim qabyldaý, rólderdi naqty bólý jáne tıimdi komandalyq komýnıkasıaǵa basa nazar aýdarylady.
Orta medısınalyq personaldy daıarlaýǵa erekshe kóńil bólinedi. Sımýlásıalyq oqytý jaǵdaıynda medbıkeler birneshe ret praktıkalyq daǵdylardy qoldana alady — ıneksıalar men perıferıalyq tamyrlardy kateterızasıalaýdan bastap, asqazandy shaıý jáne basqa prosedýralarǵa deıin — qatań bekitilgen algorıtmder boıynsha jáne pasıentter úshin qaýipsiz.
QBKJAA dırektory Erjan Seralın aldyńǵy qatarly juqpaly aýrýlar qyzmetinde 80 jyldan astam jumys istegen aýrýhana úshin sımýlásıalyq ortalyqtyń ashylýy mańyzdy oqıǵa bolǵanyn atap ótti. Onyń aıtýynsha, ortalyq medısına qyzmetkerlerin zamanaýı jabdyqtardy paıdalana otyryp, kúndelikti tájirıbege de, tótenshe jaǵdaılarda jumysqa da daıyndaýǵa múmkindik beredi.
Oqý sabaqtaryn Germanıa men Astanada mamandandyrylǵan daıarlyqtan ótken joǵary sanatty anestezıolog-reanımatolog-jattyqtyrýshylar Kenembaeva Alıa Gaýazovna jáne Mansýrova Marıa Aleksandrovna ótkizedi.
Jobany iske asyrý oqytýdyń tájirıbege baǵdarlanǵan turaqty modelin qalyptastyrýǵa, medısınalyq qatelikter qaýpin azaıtýǵa jáne qyzmetkerlerdiń synı jaǵdaılarda is-áreketke daıyn bolýyna múmkindik beredi. Sımýlásıalyq ortalyqtyń ashylýy kadrlyq áleýetti nyǵaıtýda jáne halyqtyń densaýlyq saqtaý júıesine degen senimin arttyrýda strategıalyq mańyzdy qadam bolyp tabylady.
Ashylý saltanatyna profesor Marıa Omarova, Pedıatrıa jáne balalar hırýrgıasy ǵylymı ortalyǵynyń Dırektorlar keńesiniń tóraǵasy, aýrýhana basshylyǵy, sımýlásıalyq ortalyqtyń jattyqtyrýshylary jáne medısınalyq qoǵamdastyq ókilderi qatysty.