Almatyda medısınalyq ınfraqurylymdy jańartý jáne medısınalyq kómektiń sapasyn júıeli túrde arttyrý baǵdarlamasy aıasynda №8 qalalyq klınıkalyq aýrýhanany aýqymdy qaıta jańǵyrtý josparlanyp otyr.
Almaty qalasy ákimdiginde aıtylǵanda, jańartylǵan nysan Túrksib aýdany turǵyndary úshin shuǵyl jáne josparly medısınalyq kómektiń tirek ortalyǵyna aınalady.
Jobanyń birinshi kezeńinde 1972 jyly salynǵan, qazirgi ýaqytta paıdalanylmaı turǵan ǵımarattardy eresek turǵyndarǵa arnalǵan, 150 oryndyq kópsalaly stasıonarǵa qaıta jańǵyrtý kózdelgen. Sonymen qatar osy kezeńde qabyldaý bóliminiń jańa ǵımaratyna qosymsha qurylys salý josparlanyp otyr. Pasıentter dıagnostıka men emdeýden «bir tereze» qaǵıdaty boıynsha (Check-up) óte alady.
Jobanyń ekinshi kezeńinde qoldanystaǵy korpýsty 150 oryndyq balalar aýrýhanasyna qaıta jańǵyrtý qarastyrylǵan. Atalǵan ǵımarattyń jeke qabyldaý bólimi bolady. Jańa korpýstar paıdalanýǵa berilgennen keıin qala turǵyndary keń aýqymdy medısınalyq kómekti óz aýdanynda ala alady. Onyń ishinde joǵary tehnologıalyq baǵyttar (hırýrgıa, ýrologıa, gınekologıa, nevrologıa jáne basqa da salalar), eresekter men balalarǵa táýlik boıy kórsetiletin shuǵyl medısınalyq kómek, sáýlelik jáne fýnksıonaldyq dıagnostıka múmkindikterin keńeıtý, sondaı-aq fızıoterapıa blogy negizinde ońaltý jáne qalpyna keltirý emi qarastyrylǵan.
Qazirgi ýaqytta jobalyq-smetalyq qujattama ázirlenip jatyr. Bıyl maýsym aıynda jobanyń memlekettik saraptamasynyń qorytyndysy alynady, sodan keıin qurylys-montaj jumystary bastalady.
Aıta ketý kerek, buǵan deıin mekeme «Almaty temirjol aýrýhanasy» ataýymen jumys istep, «Qazaqstandyq medıko-kosmetologıalyq ınstıtýty «Parasat» JSHS-niń senimdi basqarýynda bolǵan. 2021 jyly aýrýhana Almaty qalasy Qoǵamdyq densaýlyq saqtaý basqarmasynyń komýnaldyq menshigine berildi.