Almatyda jedel respıratorlyq vırýstyq ınfeksıalar (JRVI) men Gongkong tumaý órship tur. 32 456 naýqas JRVI juqtyrǵan. Al Gongkong tumaýy boıynsha qaladaǵy epıdahýal qandaı? Aqshamnews.kz anyqtap kórdi.
Aýrýhanaǵa jatqyzylǵandar sany qansha?
Dárigerlerdiń aıtýynsha, JRVI juqtyrǵan 415 adam aýrýhanaǵa jatqyzylǵan, olardyń ishinde 49 júkti áıel jáne 1 jasqa deıingi 61 sábı bar. Pnevmonıa dıagnozymen 71 adam stasıonarǵa túsken, onyń 12-si - 14 jasqa deıingi balalar, bireýi - bir jasqa da tolmaǵan.
Jańa epıdmaýsym bastalǵannan bergi kórsetkishter qandaı?
Jańa epıdmaýsym bastalǵaly (qazan men qarasha aralyǵy - esk.) qalada 173 428 naýqas JRVI juqtyrǵan. Bul byltyrǵy kórsetkishten 16,8 paıyzǵa joǵary.
Qarashadan bastap 3340 adam JRVI-men aýrýhanaǵa jatqyzylǵan:
- onyń ishinde 363 júkti áıel;
- 464 bir jasqa deıingi bala bar.
Pnevmonıadan 591 naýqas emdelip jatyr, olardyń qatarynda júkti áıelder de (4 adam), 14 jasqa deıingi balalar da (108 jaǵdaı, sonyń 26-sy - emizýli sábıler) bar.
Mekteptegi ahýal qandaı?
Dárigerlerdiń aıtýynsha, mektepterdegi jaǵdaı ázirge baqylaýda. Qazannan bastap Almatydaǵy 178 mektepte 1930 JRVI jaǵdaıy tirkelgen.
"Mektepterde tańerteńgi jáne aýysymdyq súzgi júrgizilip, JRVI men tumaýdyń belgileri bar balalar men qyzmetkerler anyqtalyp, úıine jiberilip otyrady", - dedi Almaty Densaýlyq saqtaý basqarmasy ókilderi.
Qandaı vırýstar aınalymda júr?
Vırýstardyń quramy da ádettegi maýsymdyq kórinisti kórsetip tur. Qarashadan beri qalada:
- A/H3N2 tıpti Gongkong tumaý,
- rınovırýs,
- paragrıpp,
- adenovırýs,
- maýsymdyq koronavırýs qatar aınalymda júr.
Gongkong tumaýyna qatysty ahýal qandaı?
Epıdósý kezeńinde A/H3N2 Gongkong tumaýyn 69 adam juqtyrǵan. Bul zerthanada rastalǵan, olardyń barlyǵy tumaýǵa qarsy ekpe almaǵandar.
Vedomstvo málimetinshe, vırýsty negizinen júkti áıelder (25 jaǵdaı), jumys isteıtin jáne istemeıtin eresekter, zeınetkerler, stýdentter, mektep oqýshylary men balabaqshadaǵy balalar juqtyrǵan.
Barlyq naýqas em qabyldap jatyr, dárigerler olardyń jaǵdaıyn qanaǵattanarlyq dep baǵalady.
DDSU Gongkong tumaýyna qatysty qandaı boljam aıtady?
Dúnıejúzilik densaýlyq saqtaý uıymy Soltústik jartysharda aldaǵy kúz-qys maýsymynda A/H1N1/pdm09 jáne A/H3N2 tumaý vırýstary, sondaı-aq V tıpti vırýs qatar aınalymda bolady dep boljaıdy. Sonyń ishinde A/H3N2 shtammynyń basym bolýy jáne alǵashqy aptalarynan-aq órshýi múmkin ekeni aıtylǵan.
Epıdmaýsym bastalar aldynda Almatyda 254 115 adam tumaýǵa qarsy vaksına alǵan.
Dárigerler ázirge dúrligýdiń qajeti joǵyn, biraq densaýlyqqa erekshe nazar aýdarýdy usynady. Ýaqtyly vaksınasıa, úı-jaıdy jıi jeldetý, kópshilik oryndarda maska taǵý, qol jýý, aýyryp qalǵanda jumysqa, mektepke barmaı, dáriger shaqyrý keregin eskertedi.