Almaty qalasynyń Óńírlík kommunıkatsıyalar qyzmetí alańynda Almaty qalasy Sport basqarmasynyń basshysy Darhan Nūrhanūlynyń qatysuymen keńeıtílgen baspasóz konferentsıyasy bolyp óttí.
Onyń aıtuynsha, 2026 jyly Almaty qalasy Sport basqarmasy sporttyq ınfraqūrylymdy odan árí nyǵaıtyp, sport nysandary qala tūrǵyndaryna qoljetímdí bola túsuí úshín bar múmkíndíktí qolǵa alyp jatyr.
Qazír «Shūǵyla» men «Avıator» dene shynyqtyru-sauyqtyru keshení memlekettík saraptamadan sáttí óttí. Taǵy ekí nysan – «Shūǵyla-2» men «Qarasu» – jobalau-smetalyq qūjattamasy ázírleníp, «Aqjar» men «Sayaly» FOK-tary memlekettík saraptamadan ótíp jatyr. Jalpy alǵanda, 6 jańa dene shynyqtyru-sauyqtyru keshenín salu josparlanyp otyr.
Sonymen qatar 1935 jyly qūrylǵan Sporttaǵy daryndy balalarǵa arnalǵan mamandandyrylǵan mektep-ınternat-kolledjíníń ornyna jańa ǵımarat salu da josparda bar. Atalǵan nysannyń jobalau-smetalyq qūjattamasy saraptamadan ótken, qūrylys qūny 5,1 mlrd teńgení qūraıdy.
Būdan bólek, qalada jazǵy olımpıadalyq sport túrlerí boıynsha tolyqqandy oqyp-jattyǵuǵa múmkíndík beretín bíryńǵaı baza jetíspeıdí. Osyǵan baılanysty Abaı – Rozybakıev kóshesíndegí sporttyq-jattyǵu keshení bazasynda sportshylardy keshendí dayarlauǵa arnalǵan osy zamanǵy sport ortalyǵyn qūru josparlanyp otyr. Būl ortalyq jattyǵular men jarystar ótkízuge arnalǵan úlken habqa aınalady.
«Atalǵan bastamanyń barlyǵy sportty júıelí damytuǵa, sportshylar úshín qolaıly jaǵdaı jasap, qala tūrǵyndaryn barynsha belsendí ómír saltyna tartuǵa baǵyttalǵan», – dep qorytyndylady Darhan Nūrhanūly.